ქალაქ ოზურგეთში, პარკირების წესის ამოქმედებასთან დაკავშირებით, კერძო ავტომობილის მფლობელი ძალიან ბევრი მოქალაქე უკმაყოფილებას გამოთქვამს საათობრივი პარკირების წესის გამო.
პარკირების მართვის ცენტრის ოპერატორის განმარტებით, მის მიერ წარმოდგენილი ყვითელი ბარათით, ნახევარი საათით დგომაა განსაზღვრული და 25 თეთრი ღირს. ლურჯი ბარათით 50 თეთრს იხდი და ერთი საათით დგომის განმსაზღვრელია.
_ თუ ორი ან მეტი საათით გაჩერდები, შესაბამისი თანხა გამრავლდება დროის რაოდენობაზე და პირი იმდენს გადაიხდის, რამდენ ხანსაც გაჩერდება.
ვერ ეგუება ხალხი ახალ წესს, თუმცა, მე ჩემს მოვალეობას ვასრულებ. რა ვქნა? არა ერთი მოდის, გაჩერდება და მერე ისე გარბის, ფულს არ იხდის. რანაირად უნდა ვდიო გაქცეულ მანქანას? ალბათ, წესები რაღაცნაირად უფრო დაიხვეწება და გაუმჯობესდება, _ გვეუბნება პარკირების მართვის ცენტრის ოპერატორი ნუგზარ ბაბილოძე.
იგი გაბრიელ ეპისკოპოსის ქუჩაზე არსებულ საპარკირე ტერიტორიაზე მუშაობს და როგორც თვითონ ამბობს, არაერთი წინააღმდეგობის გადალახვა უხდება, გადახდის თვალსაზრისით. ბაბილოძე “გურია ნიუსთან” საუბრისას აღნიშნავს, რომ დილიდან ბევრი შემთხვევა იყო, როცა მანქანა კონკრეტულმა პირებმა გააჩერეს, თანხა არ გადაიხადეს და გაიქცნენ.
პარკირების ასეთი წესის გამო, “გურია ნიუსთან” უკმაყოფილებას გამოთქვამენ მოქალაქეები:
_ თბილისს უყურებენ ესენი? ეს პერიფერიაა, ხალხს ისედაც უჭირს. თითოეული თეთრი როგორი საშოვნელია? ძვირია და ეს უნდა შეცვალონ.
_ ბანკების მერე, პარკირების წესი ხალხის გატყავების შეფუთული საშუალებაა.
_ თითქოს, არაფერია 25 თეთრი. თუმცა, საათობრივი და წუთობრივი ანაზღაურება როცა მოხდება, ეს დიდ ფულს შეაგროვებს.
_ ეშმაკობაა მოფიქრებული ხალხის გასაძარცვად, მეტი არაფერი.
_ საყვედურები აწი ნახეთ მთავრობასთან.
_ მუნიციპალიტეტის მერიის წინ დააწესონ გადასახადი, ხელფასიც ბევრი აქვთ და მანქანაც ბევრი დგას, გაიძარცვონ საკუთარი თავი!
_ გაიქცევა კაცი, აბა, რას იზამს? საინტერესოა, ჰაერზე თუ დაწესდება გადასახადი, სუნთქვის მიხედვით. წყალზეც ველოდებით, _ ირონიას და რეპლიკებს არ ერიდებიან გურულები.
მოქალაქეები, ძირითადად, დაობენ ერთ საათში 50 თეთრის გადახდის გამო, რომელიც საკმაოდ ეძვირებათ. მაგალითად, ზოგს, სამსახურის გამო, დღის მანძილზე, შესაძლოა, რვა ან ათი საათის განმავლობაში მოუხდეს დგომა, რაც ერთი თვის მანძილზე, როგორც თავად ამბობენ, ხელფასის საკმაო ნაწილია.
“გურია ნიუსი” ოზურგეთის მუნიციპალიტეტის მერიას დაუკავშირდა და პროექტის ავტორს, ოზურგეთის მუნიციპალიტეტის მერის მრჩეველს ალეკო ბერიძეს ესაუბრა.
კითხვაზე, შესაძლოა თუ არა, რომ პარკირების წესი შეიცვალოს და გადასახადის რაოდენობა შემცირდეს, ბერიძე აღნიშნავს, რომ აღნიშნული პროექტის მიზანია საპარკირე ადგილებზე ყველას ჰქონდეს წვდომა.
_ ამ პროექტის ავტორი მე ვარ. პროექტის მიზანია, საპარკირე ადგილებზე ყველას ჰქონდეს წვდომა. ჩვენი გვსურს, ადგილების 20% იყოს თავისუფალი. გარკვეულ ადგილებზე კი ეს აუცილებელია. ადამიანები, რომლებიც ადრე მიდიან და დგებიან ამა თუ იმ ადგილზე, ყველას წილი რესურსით არ უნდა სარგებლობდნენ. ეს ადგილები საერთო სარგებლობისაა. რა თქმა უნდა, ვიღაცას ეძვირება და ვერ გადაიხდის. თუმცა, ათიდან რვა დააყენებს ავტომანქანას განსაზღვრულ დროს და გადაიხდის.
_ “გურია ნიუსი” დააკვირდა პარკირების პროცესს და ვნახეთ, რომ ოპერატორს ხშირად უწევს დავა, რადგან ბევრი პარკირების თანხას არ იხდის.
_ გასაგებია, იქნებოდა ასეთი ფაქტი. პარკირების მართვის ცენტრის ოპერატორის მოვალეობაში შედის, მიაწოდოს ტალონი მას, ვინც შემოვა ტერიტორიაზე და მანქანას განსაზღვრული დროით დააყენებს. ვიღაც რომ შევარდა და გაიქცა, მჯერა. ამისთვის მალე ამოქმედდება კანონმდებლობით გათვალისწინებული საჯარიმო სანქციები. პარკირების წესების დარღვევისთვის ამოქმედდება ათლარიანი საჯარიმო სანქცია.
_ ეს საათობრივი პარკირების სისტემა მძღოლების უმეტესობას არ მოსწონს და როგორც ამბობენ, მხოლოდ ოზურგეთში მოქმედებს…
_ დიახ, ოზურგეთი დღეს ერთადერთი ქალაქია, რომელმაც საათობრივი პარკირების სისტემა აამუშავა. თუმცა, მალე სხვაგანაც ამუშავდება, მაგალითად, თბილისში.
_ არ მიგაჩნიათ, რომ ეს გადასახადი _ საათში 50 თეთრი ძვირია და შესაძლებელია თუ არა ტარიფის გაიაფება?
_ კი, შესაძლებელია შეიცვალოს, გაიაფდეს ან პირიქით, გაძვირდეს კიდეც, _ გვითხრა ბერიძემ.
