მარიკა ორაგველიძის სახელობის ლანჩხუთის სამუსიკო სკოლამ უკვე მეოთხედ უმასპინძლა მასშტაბურ და პრესტიჟულ მუსიკალურ კონკურსს, რომელიც ჩეხი კომპოზიტორისა და პიანისტის, კარლ ჩერნის სახელს ატარებს.
კონკურსი გურიაში სახელმწიფო რწმუნებულის ადმინისტრაციის, ლანჩხუთის მერიისა და მერიის განათლების, კულტურის, სპორტისა და ახალაზრდულ საქმეთა სამსახურის მხარდაჭერით გაიმართა, ხოლო პროექტის დამაარსებელი და სულისჩამდგმელი ცნობილი ქართველი პიანისტი, ხელოვნების აკადემიის რექტორი ვალერიან შიუკაშვილია.
კონკურსში საქართველოს სხვადასხვა რეგიონიდან 18 სამუსიკო სკოლა და 85 კონკურსანტი მონაწილეობდა, მათ შორის გურიის რეგიონის მორჩი პიანისტებიც, თან საკმაო წარმატებითაც.
I პრემია დაიმსახურეს ზურაბ მუჯირმა და ლუკა სარიშვილმა (ორივე ქ. ოზურგეთის სამუსიკო სკოლა).
II პრემია მიიღეს თამარ კურტანიძემ, მარიამ მურუსიძემ, ანდრია ჯაგურმა (სამივე ქ. ლანჩხუთის სამუსიკო სკოლა), თეკლა ჩუბინიძემ და ნიკოლოზ ჯიბლაძემ (ორივე სუფსის სამუსიკო სკოლა).
III პრემია გადაეცათ თომა და ბარბარე შველიძეებს, ნოდიკო ბერიძეს, მარი კალანდარიშვილს (ოთხივე ქ. ლანჩხუთის სამუსიკო სკოლა), ანა არიშვილს, ელენე კალანდაძესა და ეკატერინე ქარჩავას (სამივე სუფსის სამუსიკო სკოლა).
დიპლომები გადაეცათ ანამარია ვადაჭკორიას, ნანუკა მჟავიასა და ელისაბედ ივანიკოვს (სამივე ქ. ლანჩხუთი სამუსიკო სკოლა).
გარდა კონკურსისა ლანჩხუთის სამუსიკო სკოლის საკონცერტო დარბაზში, ,,ქართული კლასიკური მუსიკის საღამოების” ფარგლებში, კლასიკური მუსიკის დაუვიწყარი კონცერტებიც გაიმართა.
პირველი დღის საკონცერტო პროგრამა მთლიანად ქართველი კომპოზიტორების უკვდავ ნაწარმოებებს დაეთმო და ცნობილმა ქართველმა მუსიკოსებმა _ ვალერიან შიუკაშვილმა, თამარ ლიჩელიმ, ლიზი რამიშვილმა, გიორგი ხაინდრავამ და გოჩა დათუსანმა საშემსრულებლო ხელოვნების დღესასწაული შესთავაზეს სამუსიკო სკოლის დარბაზში შეკრებილ კლასკური მუსიკის მოყვარულებს.
„სცენაზე იყო უდიდესი ემოცია, უბადლო ვირტუოზულობა და სრული ჰარმონია. ეს იყო უმაღლესი დონის მუსიკალური საოცრება, რომელიც ლანჩხუთს დიდხანს ემახსოვრება!
კლასიკური მუსიკის პოპულარიზაცია და ახალგაზრდა ნიჭიერი შემსრულებლების აღმოჩენა ზუსტად ის საქმეა, რაც მომავალ თაობებს უდიდეს მოტივაციას აძლევს.
უღრმესი მადლობა ამ დაუვიწყარი წუთებისთვის, საოცარი ემოციებისთვის, საპატიო სტუმრებს, ორგანიზატორებსა და თითოეულ მონაწილეს, ვინც ეს დღესასწაული აჩუქა ჩვენს ქალაქს!“ _ ასეთია ლანჩხუთელ მსმენელთა შეფასება.
ამ მხრივ გამონაკლისი არც მეორე საკონცერტო დღე გამოდგა, დარბაზში შეკრებილმა მსმენელმა კვლავაც უბადლო შესრულება იხილა _ მათ წინაშე საფორტეპიანო მუსიკის კონცერტით ვენის კონსერვატორიის სტუდენტი, არაერთი საერთაშორისო ფესტივალის გრან-პრის მფლობელი, ახალგაზრდა პიანისტი ლევ დავიდოვი წარსდგა, რომელიც ავსტრიიდან ლანჩხუთში სპეციალურად ამ კონკურსისთვის ჩამოვიდა.
ასევე, ლამაზი საფორტეპიანო საღამო აჩუქეს ლანჩხუთელებს მუსიკოსებმა ბექა სიხარულიძემ და დათა ჩარბაძემ.
პროექტის ფარგლებში შედგება პრემიერა ფილმისა _ „გზა ხელოვნებაში“, რომელიც საქართველოს სახალხო არტისტს, თამაზ ლაფერაშვილს ეძღვნება.
ბოლოს კონკურსი გალა-კონცერტით დასრულდა და ლაურეატების ოფიციალური დაჯილდოებაც შედგა.
პროექტის ორგანიზატორი ფიქრობს, რომ ერთხელაც ლანჩხუთი აუცილებლად უმასპინძლებს საერთაშორისო კონკურსს.
„გაგიმხელთ, რომ ლანჩხუთში ვგეგმავთ საერთაშორისო კონკურსის ჩატარებას და თუ წელს ჩვენ გვყავდა საქართველოს სამუსიკო სკოლები წარმოდგენილი, ჩამოვიყვანთ უცხოელებსაც. ეს, რა თქმა უნდა, დიდი რეკლამაც იქნება ლანჩხუთისთვის და აქაური მუსიკალური ცხოვრებისთვის. არანაირი პრობლემა ამასთან დაკავშირებით არ იქნება, მე უკვე ვიცი და დარწმუნებული ვარ, ლანჩხუთი შეძლებს ამ კონკურსის ორგანიზებას. უბრალოდ, საერთაშორსიო კონკურსს ასეთი მცირე დარბაზი ვერ უმასპინძლებს. როგორც ვიცი, დაგეგმილია თეატრის შენობის რეკონსტრუქცია და როგორც კი ეს საკითხი გადაწყდება, ჩვენ საქმეს შევუდგებით.
„ლანჩხუთი აუცილებლად უმასპინძლებს საერთასორისო კონკურსს!“ _ ეს ოპტიმისტური იმედი ჯერ კიდევ შარშან გამოთქვა ვალერიან შიუკაშვილმა მედიასთან საუბრისას.
მისივე თქმით, პროექტის ლანჩხუთში განხორციელების იდეა ლანჩხუთის სამუსიკო სკოლის იუბილეზე სტუმრობის შემდეგ გაუჩნდა _ „მიუხედავად იმისა, რომ დედა გურული მყავს, სამწუხაროდ, არაფერი ვიცოდი ლანჩხუთის სამუსიკო ცხოვრების შესახებ. დაახლოებით, 5-6 წლის წინ, როცა სამუსიკო სკოლის 60 წლის იუბილე იყო, მაშინ მომიპატიჟეს. ქალბატონებმა _ ლია ურუშაძემ და მაია ჩავლეიშვილმა მომატარეს მთელი ქალაქი, გამაცნეს ლანჩხუთი. მათში დავინახე ის შესაძლებლობა, რომ თავს გაართმევდნენ კონკურსს და იმედები 100%-ით გამიმართლდა. სწორედ მაშინ გადავწყვიტეთ, რომ კარლ ჩერნის კონკურსი ლანჩხუთში ჩაგვეტარებინა და იმდენად მაღალ დონეზე კეთდება ყველაფერი, რომ ყოველწლიუარდ წინ მივიწევთ“.
