“მსურს, ვაცნობო საზოგადოებას, რომ მივიღე გადაწყვეტილება ოზურგეთის მერის თანამდებობის დატოვების შესახებ“, _ ეს განცხადება, რომელიც ოზურგეთის მუნიციპალიტეტის მერიის ფეისბუქგვერდზე გავრცელდა, ოზურგეთის მუნიციპალიტეტის უკვე ყოფილ მერს, პაატა კუნჭულიას ეკუთვნის.
პაატა კუნჭულიამ თანამდებობა 14 აგვისტოს დატოვა.
“საქმეში ჩემი ყველა ნაბიჯი ეფუძნებოდა ოზურგეთელების ინტერესებს და მათი საჭიროებების გათვალისწინებას. არასრულ ერთ წელში, ოზურგეთში შევძელით და გავახორციელეთ საზოგადოების საჭიროებებზე მორგებული, უპრეცედენტო რაოდენობის პროექტი.
ბიუჯეტის ათვისებისა და პროექტების გახორციელების მაჩვენებლით დღეს ოზურგეთი საქართველოს მუნიციპალიტეტებს შორის პირველ სამეულშია. ვამაყობ იმ შედეგით, რომელსაც ამ მცირე დროის პერიოდში მივაღწიეთ. მიხარია, რომ საკუთარი წვლილი შევიტანე ჩვენი მუნიციპალიტეტის გაძლიერებაში.
ამ ფონზე, საზოგადოებისთვის არახალია, რომ აგენტურულ ოპოზიციურ მედიასაშუალებებს ნადირობა აქვთ გამოცხადებული წარმატებასა და პროგრესზე“, _ ეს ამონარიდია პაატა კუნჭულიას წერილიდან.
“ამ მიზეზს აუცილებლად იტყოდა, რა თქმა უნდა. აბა, პარტიულ ტრენდს ხომ არ ჩამორჩებოდა? მედიას უნდა დაბრალდეს, რომ, აი, “აგენტურულმა” მედიასაშუალებებმა აიძულეს მერს გადადგომა.
ის, რომ მედია მერს ან ხელისუფლების რომელიმე წარმომადგენელს აკრიტიკებს, ბუნებრივი მოვლენაა და ეს ასეც უნდა იყოს. აბა, მათი პროპაგანდისტული მედიასაშუალებებივით უნდა იქცეოდეს დამოუკიდებელი მედია?
ჩვენ ყველამ ვიცით, რაც მოხდა, რეალურად, “ქართული ოცნების” შიდა დაპირისპირების შედეგია და სხვა არაფერი, _ გვითხრა “ადგილობრივი დემოკრატიის განვითარების ცენტრის” დირექტორმა მაგდა პოპიაშვილმა.
პაატა კუნჭულიას წერილში, ასევე, ნათქვამია, რომ მას ოზურგეთის მუნიციპალიტეტის საკრებულოსა და გურიის გუბერნატორის მხარდაჭერა არ ჰქონდა:
“ამის გარდა, მიუხედავად იმისა, რომ ადგილობრივი ხელისუფლების წარმომადგენლებმა, მათ შორის, სახელმწიფო რწმუნებულმა და ოზურგეთის საკრებულოს თავმჯდომარემ, არაერთხელ, მათ შორის, საჯაროდაც, მოუწოდეს კონკრეტულ ადგილობრივ თანამდებობის პირებს ერთიანობისკენ, სამწუხაროდ, სათანადო მხარდაჭერა და გვერდში დგომა ხელოვნურად შექმნილი პრობლემების კვალდაკვალ ვერ ვიგრძენი და დამალვას არ ვაპირებ, რომ ამასთან დაკავშირებით გარკვეული გულისწყვეტა ნამდვილად მაქვს, რამაც გარკვეული როლი შეასრულა ამ გადაწყვეტილების მიღების პროცესში“.
გურიის გუბერნატორმა გიორგი ღურჯუმელიძემ “გურია ნიუსთან” საუბრის დროს აღნიშნა, რომ კუნჭულიას გადაწყვეტილებას პატივს სცემს:
“მან გადადგომის შესახებ გადაწყვეტილება თვითონ მიიღო და ამის შესახებ საზოგადოებას განცხადებით ამცნო. ჩემთვის დასანანია მისი წასვლა, თუმცა მის გადაწყვეტილებას პატივს ვცემ“, _ გვითხრა ღურჯუმელიძე.
“გურია ნიუსის” შეკითხვაზე _ უკავშირდებოდა თუ არა პაატა კუნჭულიას წასვლა “ქართული ოცნების” ადგილობრივ პოლიტიკოსებთან არსებულ უთანხმოებას, მხარის გუბერნატორმა აღნიშნა:
“მგონი, პაატა კუნჭულიამ თავის განცხადებაში საკუთარი პოზიცია უკვე დააფიქსირა და ეს საკითხი ზედმეტ კომენტარს არ საჭიროებს“.
“გურია ნიუსი” ამ საკითხებზე ცდილობს ოზურგეთის მუნიციპალიტეტის საკრებულოს თავმჯდომარის, დავით დარჩიასა და ოზურგეთის მუნიციპალიტეტის საკრებულოში ფრაქცია “ქართული ოცნების” თავმჯდომარის, ქეთევან ხომერიკის ჩაწერას, მაგრამ ორივე მათგანი ჩვენს სატელეფონო ზარებს არ პასუხობს.
წერილის ბოლო ნაწილში პაატა კუნჭულია მადლობას უხდის “ქართულ ოცნებას” და აღნიშნავს, რომ ის მმართველი პარტიის მხარდამჭერად რჩება:
“თუმცა, ეს არ იყო მთავარი მიზეზი, რის გამოც ეს გადაწყვეტილება მივიღე. მხოლოდ იმას დავამატებ, რომ ძალიან რთული აღმოჩნდა პოლიტიკაში ყოფნა…
ამიტომ მოვუწოდებ ყველას, სათანადოდ დააფასონ ის ადამიანები, ვინც წლებია, პოლიტიკაში არიან, უძლებენ უმძიმეს გარე თუ შიდა შემოტევებს და მყარად დგანან საკუთარი სამშობლოს სადარაჯოზე.
უდიდესი მადლობა თითოეულ ჩემს თანამშრომელს _ ადამიანებს, ვინც ამ გზაზე გვერდში მედექით. თქვენი თავდადებითა და გვერდში დგომით ჩვენ დღეს უკეთეს და უფრო ძლიერ ოზურგეთში ვცხოვრობთ.
განსაკუთრებული მადლობა ჩემს ძვირფას ოზურგეთელებს. თქვენი თანადგომა, სიყვარული იყო ჩემი მთავარი ძალა, პასუხისმგებლობა და სიამაყე.
ბოლოს, მინდა განსაკუთრებული მადლობა გადავუხადო მმართველ გუნდს და მის ლიდერებს გამოცხადებული ნდობისა და მხარდაჭერისთვის _ მე ყოველთვის ვიყავი და სულ დავრჩები “ქართული ოცნების” ერთგულ, რიგით ჯარისკაცად“, _ ამბობს კუნჭულია.
“ერთიანი ნაციონალური მოძრაობის” ერთ-ერთი ლიდერი ბესო ქათამაძე პირველი იყო, ვინც პაატა კუნჭულიას თანამდებობიდან წასვლას გამოეხმაურა.
“გურია ნიუსთან” საუბრის დროს ბესო ქათამაძემ აღნიშნა, რომ პაატა კუნჭულიას თანამდებობიდან წასვლაში დიდი წვლილი მიუძღვით ბიზნესმენ ვანო ჩხარტიშვილს, ოზურგეთის მუნიციპალიტეტის საკრებულოს თავმჯდომარე დავით დარჩიასა და გურიის გუბერნატორ გიორგი ღურჯუმელიძეს:
“პაატა კუნჭულია შეეწირა შიდა დაპირისპირებას. რაც დღეს მოხდა, არის დიდი შეურაცხყოფა “ქართული ოცნების” ამომრჩევლებისთვის. მაგრამ ეს “ქართულ ოცნებას” არ აინტერესებს“, _ გვითხრა ბესო ქათამაძემ.
ოზურგეთის მუნიციპალიტეტის მერის, პაატა კუნჭულიას, გადადგომის შემდეგ მერიაში საკადრო ცვლილებები გაგრძელდა.
პაატა კუნჭულიას წასვლიდან მალევე თანამდებობის დატოვების შესახებ განცხადებები დაწერეს მისმა ორმა მოადგილემ _ გურამ გოლიაძემ და სოფო რამიშვილმა. ასევე, წავიდნენ მერიის ადმინისტრაციის უფროსი გენო მორჩილაძე და მისი მეუღლე, ლანა თოდუა, რომელიც ა(ა)იპ სკოლამდელი აღზრდის ცენტრს ხელმძღვანელობდა.
როგორც “გურია ნიუსისთვის” გახდა ცნობილი, უწყება დატოვა პროტოკოლის სამსახურის წარმომადგენელმა ნატა დოლიძემაც:
“მე აღარ ვმუშაობ ოზურგეთის მუნიციპალიტეტის მერიაში, წამოვედი“, _ უთხრა ნატა დოლიძემ “გურია ნიუსს”.
სტატიის მომზადების დროს ოზურგეთის მუნიციპალიტეტის მერის პირველი მოადგილე მოვალეობას ბექა ჩხიკვიშვილი ასრულებდა, ხოლო შემდეგ გია ანთაძე დაინიშნა, რომელიც მანამდე თეთრიწყაროს მუნიციპალიტეტის მერის პირველი მოადგილე იყო.
ავტორი
