„პოლიტიკაში ირაკლი ღარიბაშვილის სახით დაწუნებული პროდუქტი შემოგვთავაზეს, რაც „ქართული ოცნებაში“ არსებული სასოწარკვეთილების გამოძახილია“, _აღნიშნა „გურია ნიუსთან“ იუტიციის უმაღლესი საბჭოს არამოსამართლე წევრმა ანა დოლიძემ, რომელიც პოლიტიკაში ყოფილი შს მინისტრისა და პრემიერის, ირაკლი ღარიბაშვილის დაბრუნებას გამოეხმაურა.
დოლიძე პარლამენტში ირაკლი კობახიძისა და ეკა ბესელიას მიერ წარდგენილ კანონპროეტებს, რომლებიც უზენაეს სასამართლოში მოსამართლეთა არჩევის წესს შეეხება, კლანზე მორგებულ საკანონმდებლო ინიციატივებს უწოდებს.
_ ქალბატონო ანა, პარლამენტში უზენაესი სასამართლოს მოსამართლეების დანიშვნის წესთან დაკავშირებით „ქართული ოცნებიდან“ დემარშით წასული დეპუტატის ეკა ბესელიასა და პარლამენტის თავმჯდომარის მიერ საკანონმდებლო ინიციატივებია წარდგენილი. აღნიშნული პროექტებიდან რომელიმე ღირსეული მოსამართლეების არჩევის შესაძლებლობას იძლევა?
_ირაკლი კობახიძის კანონპროექტის მიხედვით, პარლამენტში წარსადგენ სიასთან დაკავშირებით გადაწყვეტილებას იუსტიციის უმაღლესი საბჭოს ორი მესამედი ანუ ათი კაცი იღებს, რომლებმაც პრობლემური მოსამართლეები თანამდებობებზე უვადოდ უკვე განამწესეს, შესაბამისად, პარლამენტის თავმჯდომარის მიერ მომზადებული ინიციატივა სასამართლო კლანის მიერ დაწერილი ვერსიაა. რაც შეეხება ეკა ბესელიას კანონპროექტის, სიის წარდგენასთან დაკავშირებით გადაწყვეტილებას იუსტიციის უმაღლესის საბჭოს მოსამართლე და არამოსამართლე წევრების ორ-ორი მესამედი, ანუ ოთხ-ოთხი კაცი იღებს. არამოსამართლე წევრებს: ირამა გელაშვილს, ლევან გზირიშვილს, შოთა ქადაგიძესა და ზაზა ხარებავას კლანზე კრიტიკული კომენტარი არასდროს გაუკეთებიათ. ისინი არიან ადამიანები, რომლებიც კლანთან შეთანხმებას ექვემდებარებიან, შესაბამისად, ეს ვერსიაც კლანურ ინტერესებზეა მორგებული. მე და იუსტიციის საბჭოს არამოსამართლე წევრი ნაზი ჯანეზაშვილი, რომლებმაც სასამართლო სისტემაში არსებული მანკიერი მმართველობა ვამხილეთ, თამაშგარე მდგომარეობაში ვრჩებით.
_ “ოცნებაში“ გუნდის განახლების პროცესს როგორ აფასებთ? როგორც ცნობილია, პარტია ახალ კადრებს მთელი ქვეყნის მასშტაბით ეძებს. აღნიშნულს ექსპერტები სკეპტიკურად უყურებენ, რომლებიც აცხადებენ, რომ პოლიტიკურ კრიზისში მყოფ მმართველ პარტიაში პროფესიონალი კადრები გაწევრიანებას არ მოინდომებენ.
_“ქართული ოცნება“ სერიოზულ პოლიტიკურ კრიზისშია. როგორც ჩანს, ვიღაცას მმართველი პარტია ბანკი ჰგონია და კონკურსის გზით წევრებს ამიტომ არჩევს. ძლიერ და მზარდ პოლიტიკურ ორგანიზაციაში ადამიანები საკუთარი იდეოლოგიური ფასეულობების გამო მიდიან და არა კონკურსის გზით. „ქართული ოცნება“ დღეს ჩვეულებრივი მკვდარი პოლიტიკური ორგანიზაცია, რომელიც წაგებისთვისა განწირული.
_ მმართველ პარტიაში არსებული კრიზისული ვითარების ფონზე პოლიტიკაში ბიძინა ივანიშვილის ერთ-ერთი სანდო კადრი ირაკლი ღარიბაშვილი დაბრუნდა, რომელსაც „ოცნებაში“ არსებული ქაოსური ვითარების დალაგება დაევალა. ყოფილი შს მინისტრისა და პრემიერის პოლიტიკური გამოცდილების გათვალისწინებით, ის გუნდში არსებული პრობლემების დაძლევას შეძლებს?
_ პოლიტიკაში ირაკლი ღარიბაშვილის სახით დაწუნებული პროდუქტი შემოგვთავაზეს, რაც „ქართული ოცნებაში“ არსებული სასოწაკვეთილების გამოძახილია. ირაკლი ღარიბაშვილი არის კადრი, რომელიც რამდენიმე წილის წინ გაუშვეს არა მადლობის სიგელით, არამედ ქვეყანაში არსებული პრობლემების გამო. ღარიბაშვილის ფუნქცია პარტიის შიდა კონტროლისა და ეფექტურობის გაზრდა იქნება, მაგრამ აღნიშნულის პოტენციალი თავის დროზე რომ ჰქონოდა, სახლში არავინ გაუშვებდა. პოლიტიკაში ირაკლი ღარიბაშვილის დაბრუნება ნიშნავს იმას, რომ „ქართულ ოცნებაში“ ახალი სახეებისა და ლიდერების სერიოზული დეფიციტია.
_როგორ ფიქრობთ, “თიბისი ბანკის“ დამფუძნებლის მამუკა ხაზარაძისა და ბადრი ჯაფარიძის მიმართ სამართლებრივი დავა პოლიტიკურად მოტივირებულია? და ასევე, აღნიშნული პროცესების ფონზე, რა ზიანი ადგება ანაკლიის პორტის მშენებლობას?
_არსებობს კონკრეტული პირების ინტერესები იმასთან დაკავშირებით, რომ ანაკლიის პორტის მშენებლობა წინ არ წავიდეს. ხაზარაძე-ჯაფარიძის მიმართ წაყენებული ბრალდების გამო, შეიძლება, ერთ-ერთი გეოპოლიტიკური პროექტი _ანაკლიის პორტის მშენებლობა წინ ვერ წავიდეს. ეს უკვე ერთი კონკრეტული სამართლებრივი დავა აღარ არის, ეს სერიოზული პოლიტიკური საკითხია. აღნიშნული საქმე პროკურატურის კომპეტენციას სცილდება. პროკურატურაში უამრავი გახმაურებული საქმე გამოუძიებელი დევს და დარწმუნებული ვარ, რომ ახლაც ასეთ შემთხვევასთან გვაქვს საქმე. თუ თემა დროულად არ დაიხურა, ანაკლიის პორტს საფრთხე შეექმნება, ამიტომ აღნიშნულზე საუბარი ერთხელ და სამუდამოდ უნდა დასრულდეს.
_“ქართულ ოცნებაში“ სამთავრობო ცვლილებები იგეგმება. როგორც ცნობილია, მინისტრთა კაბინეტს იუსტიციის მინისტრი თეა წულუკიანი და განათლების, მეცნიერების, კულტურისა და სპორტის მინისტრი მიხეილ ბატიაშვილი გამოემშვიდობებიან. აღნიშნული ცვლილებები მმართველი პარტიის ეფექტურობაზე როგორ აისახება?
_თეა წულუკიანის გათავისუფლებას ძალიან დიდი ხანია ვითხოვ. რა უკუსვლებიც გვაქვს პროკურატურასა და სასამართლოში, ამ ყველაფერზე ფასის გადახდა თეა წულუკიანს მოუწევს. რაც შეეხება განათლებას, „ქართული ოცნების“ პირობებში ყველაზე ჩავარდნილი განათლების სისტემა არსებობს. ადამიანები სკოლას რატომ ამთავრებენ, არ იციან. არ არის განვითარებული პროფესიული განათლება. ადამიანები ვერ საქმდებიან, რაზეც პასუხისმგებელი მმართველი პარტიაა. „ქართულ ოცნებას“ საკადრო ცვლილებები არ უშველის, რადგან არსებობის ბოლო ეტაპზე იმყოფება.
