“ვფიქრობთ, რომ ნინოშვილის საბავშვო ბაღს თებერვლის შუა რიცხვებისთვის გავხსნით, ხოლო გულიანში არ არის დასრულებული ლიფტის დამონტაჟება და უკანა ტერიტორიაზე მიწის გარკვეული გამაგრებითი სამუშაოებია შესასრულებელი. მოკლედ, ნინოშვილი და გულიანი არ არის პრობლემური”, _ ეს განცხადება ლანჩხუთის მერმა, ალექსანდრე სარიშვილმა მიმდინარე წლის იანვარში გამართულ საკრებულოს სხდომაზე გააკეთა ოპოზიციის მხრიდან დასმული კითხვის პასუხად.
ალექსანდრე სარიშვილის თქმით, ნინოშვილის საბავშვო ბაღში 112-ის სამსახურის სტანდარტების შესაბამისად, დამატებითი ღონისძიებები იყო გასატარებელი.
მართალია, თებერვლის შუა რიცხვები კარგა ხანია, გავიდა და ზაფხულიც დაიწყო, თუმცა, ნინოშვილის საბავშვო ბაღის კარები მაინც გამოკეტილია.
ჰოდა, ოპოზიციაში ფიქრობენ, რომ ნინოშვილის საბავშვო ბაღი, რომლის მშენებლობაც მუნიციპალური განვითარების ფონდმა დააფინანსა და სამუშაოებზე ნახევარ მილიონ ლარამდე გაიხარჯა, მეწყრულ ზონაშია აშენებული. ვარაუდობენ, რომ ვერგახსნის მიზეზიც სწორედ ესაა.
“გახარია-საქართველოს” გუნდის წევრის, ჯუმბერ ბლაგიძის თქმით, ახლად აშენებული ბაღის შენობა, სულ რაღაც ხუთიოდე მეტრშია მეწყრის შედეგად დაზიანებული გზის მონაკვეთიდან. ამასთან, ტერიტორიულად ახლოა ძველი ბაღის და სკოლის შენობებთან, რომელთა ფუნქციონირება უკვე წლებია შეჩერებულია.
ალექსანდრე სარიშვილისთვის კი კატეგორიულად მიუღებელია მოსაზრება, რომ ახლადაშენებული ბაღის შენობა მეწყერსაშიშ ზონაში მდებარეობს.
იგი ბაღის გახსნასთან დაკავშირებით ახალ ვადებზე ალაპარაკდა. როგორც მან საკრებულოს ბოლო სხდომაზე თქვა, ნინოშვილის ბაღი სექტემბერში მზად იქნება აღსაზრდელების მისაღებად.
“არანაირი სხვა პრობლემა იქ არ არსებობს. სექტემბრისთვის ნინოშვილის ბაღი მზად იქნება. გულიანის ბაღში კი გარკვეული ხარვეზებია და კომპანიასთან მიდის დაჯარიმების თემა, ასევე, მიმდინარეობს საბუთების დამუშავება. იმის თქმა, რომ ბაღი აშენდა მეწყრულ ზონაში, არის დემაგოგია. საკრებულოს წევრები ხართ, მიდით ადგილზე, ნახეთ და მერე გააკეთეთ განცხადებები, ვიღაცის ნათქვამს არ უნდა აყვეთ, ჭორაობა გამოდის”, _ საყვედური გამოთქვა მუნიციპალიტეტის მერმა ოპოზიციის მისამართით.
ოფიციოზისგან განსხვავებით კი, ოპოზიციაში ფიქრობენ, რომ ეს მონაკვეთი მთლიანად მეწყრულ ზონას წარმოადგენდეს და რისკის საშიშროებასაც ხედავენ. ამაზე თვეების წინ ენმ-ის ლანჩხუთელი ლიდერი, კახა ასკურავაც საუბრობდა:
“ჩემი ინფორმაციითაც, ნინოშვილის ბაღის ვერ გახსნის მიზეზი, მისი მეწყრულ ზონაში აშენებაა. ამ ეჭვს მიმყარებს ის, რომ ამ შენობიდან რამდენიმე მეტრში დგას სკოლის შენობა, რომელიც ორ წელზე მეტია, დახურულია მეწყრული ზონის გამო და ნინოშვილელი სკოლის მოსწავლეები მეზობელ სკოლებში დადიან სასწავლებლად. ფაქტია, ახალი ბაღის შენობა ერთი წელზე მეტი იქნება, რაც დასრულებულია და არ იხსნება”.
რაც შეეხება საკრებულოს კიდევ ერთ ოპოზიციონერ წევრს, პარტია “ლელოდან”, გოჩა ჯანაშიას, ის თვლის, რომ რაღაც არის მიზეზი, რის გამოც, ეს შენობა არ იხსნება.
“გასაგებია, რომ ნინოშვილის ბაღის ახალ აშენებულ შენობას მეწყერის კვალი არ ეტყობა, მაგრამ ეს მხოლოდ ამ ეტაპზე. მე არ ვამტკიცებ, რომ ხვალ ან ზეგ შენობა აუცილებლად დაზიანდება, მაგრამ არის დიდი ალბათობა, რომ ეს მოხდეს. რატომ? იმიტომ, რომ ეს შენობა, ფაქტობრივად, მეწყრული ზონის რისკის ქვეშ მდებარეობს და ძალიან კარგად ვიცით, მეწყრული პროცესი როგორ ვითარდება დროთა განმავლობაში. როცა შენობის წინ, ხუთიოდე მეტრში გზის მონაკვეთი დამეწყრილია, ფაქტობრივად, შენობაც მეწყრულ ზონას ეკუთვნის. მართალია, მუნიციპალიტეტის მერი აცხადებს, რომ ექსპერტიზამ თავის დროზე იქ მეწყრული რისკები გამორიცხა და მშენებლობასაც მწვანე შუქი აუნთო, მაგრამ შესაძლო გართულებებზე პასუხისმგებლობის აცილება, ძალიან რთული იქნება”, _ ამბობს ჯანაშია.
ავტორი
