“გამჭვირვალობის კანონის” შესახებ კამათი, დავა, დაპირისპირება თუ მისი სრული იგნორირება _ ასეთ გამოხატულებას ჰპოვებს მიმდინარე პროცესები ხალხში.
ოზურგეთში ჩვენ პერმანენტულად ვაგრძელებთ გამოკითხვას და არა ერთხელ მივმართეთ საზოგადოების სხვადასხვა ფენის და ასაკის წარმომადგენლებს; ასევე, მივმართეთ როგორც ოპოზიციის, ისე სახელისუფლებო პარტიის წარმომადგენლებს, გამოეთქვათ საკუთარი მოსაზრება აღნიშნულ კანონზე.
საგულისხმოა, რომ საზოგადოებაში აზრი არაერთგვაროვანია.
რიგითი ოზურგეთელი ბადრი მამალაძე მიიჩნევს, რომ კანონი აუცილებლად მისაღებია:
“ფულს რომ ხარჯავ, თუ წესიერად ხარჯავ, რატომ უნდა მალავდე? ძალიან კარგად მოვუსმინე და გავიგე. მისაღებია ეს კანონი და მე მხარს ვუჭერ”.
სერგო ბოიაჯანი, მძღოლი: “კანონის მიღებაზე რასაც უმრავლესობა საუბრობს, ის მიმაჩნია სწორად. მისაღებია ეს კანონი”.
“რა კანონი? პირველ რიგში, ამ კანონის საჭიროება არ არსებობს. ამხელა პოლიტიკური ფასის გადახდა არანაირად არ იყო საჭირო. ახლა ეჭვქვეშ დადგა როგორც ქვეყნის, ისე ჩვენი ახალგაზრდების მომავალი. 60-70 წლის კაცს, იქნებ, სულ არ ადარდებს, აწი რანაირი იქნება მისი მომავალი, მაგრამ ჩვენმა შვილებმა რა დააშავეს?! ეს სისტემა უნდა შეიცვალოს. ისე ამ ქვეყანას მომავალი არ აქვს”, _ ამბობს ოზურგეთელი ადვოკატი, სამართალმცოდნე კახა ჩავლეშვილი.
ოზურგეთელი ვასიკო ჩხაიძე კატეგორიულია კანონის შეფასებისას: “არ ვარგა ეს კანონი არანაირად. რა დროს ჩხუბი და აყალმაყალია? რაც შეიძლება, მალე წაიღონ უკან”.
რას ფიქრობენ კანონის გამჭვირვალობაზე ახალგაზრდები?
ბადრი გუჯაბიძე, მერიის საჯარო სკოლის უფროსკლასელი: “სიმართლე გითხრათ, არც წამიკითხავს. მე სპორტსმენი ვარ, მოჭიდავე. ვემზადები წასასვლელად, ნაკრებს ვარჯიში აქვს. ჩემი საქმე მაქვს და ამ კუთხით უნდა ვიაქტიურო”.
ნინო წიტაიშვილი, 19 წლის: “არ წამიკითხავს, მოვისმინე, თუმცა, ჩემს თანატოლებს ვეთანხმები _ არა რუსულ კანონს და წინ ევროპოსკენ!”
ელიკო შეწირული ამბობს, რომ კანონი “არ გადაუქექავს”: “სიმართლე გითხრათ, ახლა რომ ვთქვა, დავჯექი და გადავქექეო, არა! რასაც ვისმენ ტელევიზიით თუ ღია სივრცეში, შეკრებებზე, ის ვიცი. რომ იძახიან დაჟინებით რუსულიაო, თუ მართლა რუსულია, არ მინდა. ისე კი, არ ვიცი, ქართულია, რუსული თუ ფრანგული”, _ ღიმილით დაასრულა მან თავისი კომენტარი.
ბონდო ღლონტი, ოზურგეთის “რაგბის” ხელმძღვანელი: “დიახ, მისაღებია ეს კანონი. ის აქციები რომ ტარდება ახლა, როგორ ტარდება? ზუსტად იმ შავი ფულით ახდენენ ორგანიზებას. ამიტომ უნდა მოხდეს კანონის მიღება”.
გოჩა გორდელაძე, ადვოკატი, იურისტი: “კანონი არ შეიძლება იყოს არც რუსული, არც ქართული. კანონი უნდა მიიღოს ისეთმა პარლამენტმა, რომელიც ხალხს ემსახურება. ვის ემსახურება ეს კანონი? და საერთოდ ვინ როგორ ასრულებს კანონს ამ ქვეყანაში? უბრალო მაგალითს მოვიყვან: გვითხრეს, რომ სალომე ზურაბიშვილი უნდა აგვერჩია პრეზიდენტად. რომ ის იყო და იქნებოდა საუკეთესო. რა გამოვიდა? დღეს არც მე მომწონს, მაგრამ ვინ იღებს პასუხისმგებლობას? არის ვინმე, ვინც სრულ პასუხისმგებლობას იღებს კანონზე და შეუძლია, დაგვარწმუნოს, რომ ის კარგი და სრულყოფილია? და არაა ზუსტად რუსულის შესატყვისი?”
ოზურგეთის საკრებულოს წევრი გელა ჩავლეშვილი, პარტია “ხალხის ძალა”: “ჩემი აზრით, ეს არის ერთადერთი სწორი და მისაღები კანონი. მე მხარს ვუჭერ მის მიღებას ყველა ასპექტით. არაფერს არ ვხედავ აქ რუსულს და საერთოდ, სად წერია, კანონის ეროვნება თუ სადაურობა? ანალოგიური კანონი მიღებული აქვთ მთელ რიგ ქვეყნებს, მათ შორის, დიდ ბრიტანეთს, ამერიკას, ევროკავშირის ბევრ ქვეყანას, საფრანგეთს, სერბეთს. დიდი ბრიტანეთი რუსეთუმეა? უფრო მძიმედაც წერია ამ ქვეყნების კანონებში.
მე “ქართულ ოცნებას” ამ საკითხში ვეთანხმები და მხარს ვუჭერ კანონის მიღებას. დღეს, მსოფლიოში მოქმედ კანონთა შორის, ყველაზე ლოიალურია ეს კანონი. თუ ვინმეს არგუმენტირებული პასუხი აქვს, გამართონ დისკუსია. მე დაბალი რანგის ჩინოვნიკი ვარ და ერთი ნულოვანი ანგარიში რომ გამომრჩეს, უკვე ვჯარიმდები. ესენი ვინ არიან, რომ დეკლარაცია არ შეავსონ? ზუსტად გამჭვირვალობაა ევროპული და დამალვა _ რუსული. მე თუ მეხება დეკლარაციის შევსება, შეეხოს მათაც”.
სხვადასხვა ადამიანები თუ საჯარო მოხელეები, პოზიციური თუ ოპოზიციური პარტიების მომხრეები, აღნიშნულ კანონს სხვადასხვანაირად აფასებენ და აღიქვამენ.
დავით დარჩია, ოზურგეთის მუნიციპალიტეტის საკრებულოს თავმჯდომარე: “გამჭვირვალობის რატომ უნდა გეშინოდეს? თუ საქმიანობ, დეკლარაცია უნდა შეავსო ისე, როგორც ჩვენ ვავსებთ. რამდენი არასამთავრობო ორგანიზაცია ჩამოთვალა მდინარაძემ, რომლის საქმიანობა არაა გამჭვირვალე. ადგა იქედან რომელიმე და თქვა საპასუხოდ, არაა ეს მართალი და მაქვს დეკლარაცია შევსებულიო? ან სადმე აქვთ ღიად და გამჭვირვალედ მითითებული? თქვან, მაშინ. რა თქმა უნდა, მე მივესალმები ამ კანონს. სასწრაფოდ მისაღებია”.
შალვა თავდიშვილი, ოზურგეთის მუნიციპალიტეტის საკრებულოს წევრი “ნაცმოძრაობიდან”: “ეს კანონი არის რუსეთის შემოგდებული თემა. არჩევნებისთვის ამზადებენ საქმეს, რომ არ არსებობდნენ არასამთავრობოები, არ ჩამოვიდნენ დამკვირვებლები. არ უნდა მიიღონ ეს კანონი და თუ მიიღებენ, მოხდება ისე, რომ ხალხი კინწისკვრით გააგდებს “ქართულ ოცნებას” ხელისუფლებიდან.
მე, პირადად, კატეგორიულად წინააღმდეგი ვარ ამ კანონის მიღების. გაგახსენებთ, ადგილობრივ დონეზე, ოზურგეთის მუნიციპალიტეტის მერმა, კოტე შარაშენიძემ, თავის დროზე, რეორგანიზაცია რომ ჩაატარა, სულ ათი კაცი გაათავისუფლა სამსახურიდან, თან შეთავაზებით. თალაკვაძე და მისი გუნდი, როცა მოვიდნენ ხელისუფლებაში და რეორგანიზაცია დაიწყეს, იძახდნენ: “ჩვენ კოტე შარაშენიძე კი არ ვართ, ხალხი რომ გავყაროთო” და ასი ადამიანი მაინც გააგდეს სულ ტყუილად სამსახურიდან. დიქტატურა მეტს რას ქვია. შედარებას იმიტომ ვაკეთებ, რომ ესენი,ამ კანონის მიღების შემთხვევაში, სულ გაწმენდენ ყველაფერს. დატოვებენ მარტო თავის სამთავრობო არასამთავრობოებს, თავის აქტივისტებს და მორჩა!”
გრამიტო მამინაშვილი: “მე არც ერთი პარტიის მომხრე და წევრი არ ვყოფილვარ არასდროს. ეგაა, ვფიქრობდი, ყოველ მომდევნო არჩევნებზე, უფრო უკეთესი ამერჩია. ახლა ეს კანონი რომ რუსეთს აძლევს ხელს და ამ ხელისუფლებას რომ არ უნდა ევროკავშირში შესვლა, ეს ცხადია. მთელი მსოფლიო ეუბნება, არაა ეს ევროპული კანონიო და მაინცდამაინც კობახიძემ და მდინარაძემ იცის, როგორია? ხალხი არ დათმობს, მგონია, ამ ამბავს…”
აკაკი ღლონტი, ფერმერი: “მე თუ გინდა თავი მომჭრან, ტანი გახდეს გასაბერად…” მაინც სიმართლეს ვიტყვი _ რუსულ კანონად მიმაჩნია მაინც. ასე ვფიქრობ და ვინც საწინააღმდეგოს ფიქრობს, “ქართული ოცნება”, მაგალითად, ალბათ, ჩემზე ჭკვიანია, რა ვიცი…”(იცინის).
ლილი ბაქანიძე, ოზურგეთელი რიგითი მოქალაქე: “გამჭვირვალეა თუ დახურული, არ მგონია, ვინმე ხალხისთვის იკლავდეს თავს. ზოგს ხელისუფლების დაკარგვის ეშინია, ზოგს კი ხელისუფლებაში მოსვლა სურს. სკამს და ფულს ეძებს ყველა, კარგით, რა…სამშობლოზე ვზრუნავთო, მხოლოდ საკუთარი ზრახვების დასამალად იძახიან”.
ვლადიმერ ჩავლეშვილი, მერის წარმომადგენელი სოფელ მთისპირში: “მოკლედ გეტყვით _ დიახ, მხარს ვუჭერ გამჭვირვალობის კანონს და ის ყველასთვის უნდა იყოს ერთნაირი”.
ბადრი თავდუმაძე, მერის წარმომადგენელი სოფელ ოზურგეთში: “მე არა როგორც საჯარო მოხელე, არამედ როგორც საქართველოს რიგითი მოქალაქე ვამბობ, რომ კანონი უნდა იყოს ყველასთვის გამჭვირვალე”.
ასეთია მოქალაქეთა მოსაზრება გამჭვირვალობის კანონის შესახებ, თუმცა, არიან ადამიანები, რომლებიც საერთოდ არიდებენ თავს პასუხს და ამბობენ, რომ ეს კანონი არ აინტერესებთ.
ავტორი
