“კატეგორიულად ვითხოვთ, აღიძრას სისხლის სამართლის საქმე სასჯელაღსრულების, პრობაციის და იურიდიული დახმარების საკითხთა სამინისტროს აღმოსავლეთ საქართველოს ადგილობრივი საბჭოს თავმჯდომარის ალექსანდრე დარახველიძის წინააღმდეგ. აქვე მივითხოვთ, გულდასმით გაეცნოთ ჩვენს მიერ წარმოდგენილ ფაქტებს, შეამოწმოთ კომისიის საქმიანობა, გამოავლინოთ დამნაშავეები და მკაცრად აგებინოთ პასუხი ამ “ნაციონალური მოძრაობის” გადმონაშთებს.
საქმის არსი კი მდგომარეობს შემდეგში: ალექსანდრე დარახველიძე და მისი ხელქვეითები ზერელედ და გაუაზრებლად იხილავენ საქმეებს და აუბედურებენ პატიმართა მომავალს. მოქმედებენ შერჩევითობის პრინციპით, სადაც აშკარად იკვეთება მექრთამეობის ნიშნები. ამ კომისიის მუშაობა არის აბსოლუტურად გაუმჭვირვალე და ხელმიუწვდომელი. მათ მიერ აკვიატებული მე-12 მუხლის კრიტერიუმები გასაიდუმლოებულია და გაურკვეველია. არადა, ძირითადად უარის მიზეზი სწორედ ეს მე-12 მუხლია. სტატისტიკა კატასტროფულია- 4-7% დადებითი პასუხი მხოლოდ მაშინ, როდესაც ჩვენ, პატიმრებმა გადავიტანეთ ძირითადი დარტყმა სააკაშვილის სისხლიანი რეჟიმის მხრიდან და აქედან გამომდინარე, პროკურატურამ უმრავლესობას დაზარებულის სტატუსი მოგვანიჭა. რა მორალური და კანონიერი უფლება აქვს “სადს” ზერელედ განიხილოს ჩვენი საქმეები და ყოველგვარი დასაბუთების გარეშე უარყოფითი პასუხებით გამოგვისტუმროს?
ერთი სიტყვით, ჩვენთვის კარგად არის ცნობილი დარახველიძის კრიტერიუმები: დეიდები, ბიძები, სანათესაო, არც მეტი, არც ნაკლები, არსებობს გონივრული ეჭვი _ ქრთამი, რაც საქმეების უბრალო გადახედვითაც ნათლად ჩანს. გარდა ამისა, გვაქვს უტყუარი ინფორმაცია, რომ კომისიის წევრები როდესაც ვერ პოულობენ უარის მყარ მიზეზს, იწყებენ დაზარალებულებთან რეკვას და მათ წაქეზებას ჩვენს წინააღმდეგ, ეს კი კანონით აკრძალულია. ამ პრობლემასთან დაკავშირებით, რუსთავის N16 დაწესებულების 1000-მდე პატიმარმა განცხადებით მიმართა ბატონ ბიძინა ივანიშვილს და სხვადასხვა კომპეტენტურ ორგანიზაციებს. მოგმართავთ თხოვნით, შეისწავლოთ კომისიის საქმიანობა და მისი თავმჯდომარის ალექსანდრე დარახველიძის წინააღმდეგ სისხლის სამართლის საქმე აღძრათ.”-აღნიშნულ განცხადებას ქსნის N15 დაწესებულების 14 პატიმარი აწერს ხელს.
“გურია ნიუსი” სასჯელაღსრულების მინისტრის მოადგილეს გრიგოლ გიორგაძეს დაუკავშირდა. გიორგაძე პატიმრების ბრალდებებს უარყოფს და ამბობს, რომ პირობით ვადამდე გათავისუფლების პროცენტული მაჩვენებელი 15 %.-ია.
“ამნისტიის შემდეგ ციხეში დარჩენილ ბევრ ადამიანს შეუმცირდა სასჯელი და შესაბამისად, დაუდგათ პირობით ვადამდე გათავისუფლების საშეღავათო პირობები. პატიმრებისგან უამრავ განცხადებას ვიღებთ, თუმცა 2013 წლის იანვრიდან განცხადების დაწერა კანონით საჭირო აღარ არის და ციხის ადმინისტრაცია ვალდებულია, ინფორმაცია მსჯავრდებულთა შესახებ ვისაც პირობით ვადამდე გათავისუფლება ეხება, მოაწოდოს საბჭოებს.”
_ მსჯავრდებულების ამბობენ, რომ დაკმაყოფილებულ განცხადებათა რაოდენობა მცირეა და 5-7% არ აღემატება.
_ შემოსული შუამდგომლობების დაახლოებით 15% კმაყოფილდება.
_ მსჯავრდებულთა მტკიცებით, კომისია უკავშირდება და განზრახ აბუნტებს დაზარალებულებს, რათა პატიმრის ვადაზე ადრე გათავისუფლება არ მოხდეს.
_ ტყუილია ეგ. ჩვენ არ ვუკავშირდებით, ისინი თავად გვიკავშირდებიან.
_ რა კრიტერიუმებს უნდა აკმაყოფიოებდეს მსჯავრდებული იმისათვის, რომ მისი ვადამდე გათავისუფლების საკითხი დადებითად გადაწყდეს?
_ პირობით ვადამდე გათავსიფლების საკითხის განხილვის დროს მხედველობაში მიიღება დანაშაულის ხასაითი, მსჯავრდებულის დამოკიდებულება ჩადენილ დანაშაულთან, მისი ქცევა სასჯელაღსრულების დაწესებულებაში, მისი ოჯახური და ჯანმრთელობის მდგომარეობა, ასევე ფასდება განმეორებითი დანაშაულის ჩადენის რისკები.
_ ანუ დაზარალებულის პოზიციის გათვალისწინება კანონის მოთხოვნა არ არის?
_ დაზარალებული არ არის პირდაპირ დაკავშირებული, ანუ საკანონმდებლო მოთხოვნა არ არის, მაგრამ ვიღებთ უამრავი განცხადებას, რომ ამა თუ იმ პირმა არ დატოვოს დაწესებულება და ბუნებრივია, რაღაც მომენტში, დანაშაულის ხასიათის გათვალისწინებით, შეიძლება მათი პოზიცია მხედველობაში იქნას მიღებული. თუმცა დარეკვა არ ხდება ჩვენი ინიცატივით.
მასალის მომზადების პროცესში “გურია ნიუსს” კიდევ ერთი პატიმარი დაუკავშირდა, რომელიც ყვება, რომ პირობით ვადამდე გათავისუფლების ადგილობრივი საბჭოდან მის საქმეზე დაზარალებულად ცნობილ ადამიანს დაუკავშირდნენ:
“დაზარალებულს დაურეკეს და უთხრეს, რომ ვადამდე გათავისუფლება მოვითხოვე და თუ ხართ თანახმაო? ის, რა თქმა უნდა, არ იყო თანახმა. სასჯელის მოხდამდე 15 თვე მაქვს დარჩენილი, არც ერთი დარღვევა არ მაქვს, მაგრამ საბჭომ ჩემს საკითხზე უარყოფითი გადაწყვეტილება მიიღო. მეუბნებოდნენ, თუ იმ დაზარალებულს გააჩუმებ და დაითანხმებ, გაგიშვებთო. არ მესმის რომელ კანონში წერია ეს?”
