“გურია ნიუსი” ამ პროცესებს რამდენიმე საათის განმავლობაში, ბახმაროს შესასვლელთან აკვირდებოდა.მრავლად მობილიზებული სამართალდამცავები თავისუფლად, შემოწმების გარეშე ატარებდნენ მიკროავტობუსებს, რომელშიც ნაციონალური მოძრაობის მაისურიანი ადამიანები ისხდნენ. სამაგიეროდ, კორდონი ვერ გადალახეს “ქართული ოცნების” მხარდამჭერებმა. “ქართული ოცნების” წარმომადგენლებმა პოლიციელების მიერ გაკეთებული ჯაჭვის გარღვევა რამდენჯერმე უშედეგოდ _ “გაუმარჯოს საქართველოს!”, ძახილით სცადეს. ბახმაროში შეშვებას პოლიციის მიერ “დაწუნებული” ის ადამიანებიც ითხოვდნენ, რომელთა “ბრალი” ოპოზიციონერებისთვის მისალმებაში და “ოცნების” აქტივისტების მიერ მიწოდებული გაზეთების აღებაში გამოიხატებოდა. სამართალდამცავებს ახსნა-განმარტებები არ გაუკეთებიათ _ არც ერთი მათგანი არ პასუხობდა შეკითხვას, თუ რატომ არ უშვებდნენ მოქალაქეებს ბახმაროში.
მაია გიორგაძე, “ქართული ოცნების“ მხარდამჭერი: _ რატომ არ მიშვებთ? პასუხი გამეცით რატომ არღვევთ ადამიანების უფლებებს, რატომ არ გვიშვებ, მოქალაქე ვარ და ბახმაროში მივდივარ (იხილეთ ვიდეო https://gurianews.com/1.html?task=videodirectlink&id=232).
გოჩა ჯიქია, “ქართული ოცნების” საარჩევნო შტაბის ხელმძღვანელი: _ რატომ არ გვიშვებთ, ხალხო, ამიხსენით მაინც ვინმემ, დაგველაპარაკეთ მაინც. ის მაინც გვითხარით, რატომ არ გვიშვებთ და დავბრუნდებით უკან. ეს ხელისუფლება არ იქნება, თქვენ მაინც ასე იდგებით და შეგრცხვებათ, _ მიმართავდა ჯიქია სპეცრაზმელებს.
ბახმაროში შარშან არც თემურ ჭკუასელი შეუშვეს. მაშინდელი დეპუტატობის კანდიდატი იმდროინდელ ხელისუფლებას კარგა ხნის განმავლობაში სთხოვდა, კითხვაზე _ რატომ არ შეუშვეს ბახმაროში “ქართული ოცნების” წევრები, პასუხი გაეცათ. კითხვა უპასუხოდ დარჩა და როგორც ჩანს, თანამდებობებზე მოხვედრის შემდეგ ეს “მეოცნებეებსაც” დაავიწყდათ. ყოველ შემთხვევაში წელს, 19 აგვისტოს, ბახმაროში, ტრადიციულ დღესასწაულზე, სახელდახელოდ მოწყობილ ტრიბუნაზე, რომელიც შარშანდლის ანალოგიური იყო, დღევანდელი და ყოფილი ხელისუფლების წარმომადგენლები ერთად ისხდნენ და სიამოვნებით ადევნებდნენ თვალს მიმდინარე კონცერტს.
უფრო მეტიც, დოღის დაწყებიდან დასრულებამდე საკრებულოს თავმჯდომარე, ანტონ ხუნდაძე და გოჩა ჯიქია, რომელიც დღეს სპორტსკოლის დირექტორია, გვერდიგვერდ იდგნენ და ისე მეგობრულად საუბრობდნენ, შარშანდელი მოვლენების თვითმხილველი რომ არ ვყოფილიყავით, ნამდვილად რთული დასაჯერებელი იქნებოდა, რომ ჯიქია ის ადამიანი იყო, რომელიც სწორედ ხუნდაძის პირველი პირობის დროს არ შეუშვეს ბახმაროში.
როგორც გამოჩნდა, “კოჰაბიტაცია გურულად” უმაღლეს ფაზაში შევიდა, თუმცა, ჯიქია ჩვენთან საუბრისას ამას კატეგორიულად უარყოფს;
_ბატონო გოჩა, გასულ წელს, ამ ტრიბუნასთან კი არა, ბახმაროში არ შეგიშვეს. წელს გიყურებთ და შესანიშნავად კოჰაბიტირებთ იმ ადამიანებთან, რომლებიც აქ არ გიშვებდნენ.
_ კერძოდ?
_ თუნდაც, ანტონ ხუნდაძესთან…
_ (გაეცინა)
_ ეს სასაცილოა? კოჰაბიტაცია კარგია?
_ ძალიან ცუდი.
_ არ გეტყობოდათ…
_ უბრალოდ, მოგვიხდა ერთად დგომა და ეს არ ნიშნავს, რომ კოჰაბიტაციაა. მე არ ვარ ის ადამიანი, რომ ასე ადვილად შევეგუო. პირდაპირ ვაცხადებ, რომ ძალიან ცუდია კოჰაბიტაცია, _ გვითხრა ჯიქიამ.
როგორც აღმოჩნდა, გასული წლის ამბავი უკვე პარლამენტარ ჭკუასელსაც დავიწყებია. უფრო მეტიც, დეპუტატს არც ის ახსოვდა, “გურია ნიუსს” ინტერნეტტელევიზიაც რომ აქვს და სწორედ ამ ტელევიზიის საშუალებით იხილა მთელმა საქართველომ კადრები, თუ როგორ არ შეუშვეს ისინი ბახმაროში.
_ ვისთვის უნდა ჩამწეროთ?(?!) _ დაინტერესდა ჭკუასელი, რომელიც, როგორც ჩანს, “დიდი ტელევიზიებისთვის” ამჯობინებს ინტერვიუს მიცემას.
_ “გურია ნიუსისთვის”.
_ ტელევიზია გახდა “გურია ნიუსი”? _ ისე გაუკვირდა ჭკუასელს, ჩვენც კი შეგვეპარა ეჭვი, შარშან ის ითხოვდა ჩვენს მიერ გადაღებულ კადრებში ბახმაროში შეშვებას თუ სხვა ვინმე.
_ არჩევნებზე გახსოვდათ, რომ გვქონდა და დღეს აღარ გახსოვთ?
_ ყველაფერი მახსოვს ჩემო კარგო (?!)
_ სხვათაშორის, სწორედ ამ ტელევიზიამ გაავრცელა კადრები შარშან, როცა აქ არ შემოგიშვეს და საინტერესოა, დღეს რას ფიქრობთ ამ ყველაფერზე? დღეს, ამ ტრიბუნაზე ჩვენ ის ადამიანები დავინახეთ, რომლებიც აქ არ გიშვებდნენ _ ისინი ისეთივე კმაყოფილი სახეებით უკრავდნენ ტაშს, როგორც შარშან. ეს ყველაფერი მოგწონთ?
_ ძალიან კარგია, რომ გამახსენეთ. პირველ რიგში, ფერისცვალებას გილოცავთ თქვენ, “გურია ნიუსის” თაყვანისმცემლებს და ყველას ვეფერები. სიმბოლური დღეა, იმიტომ, რომ მართლაც დაიწყო ფერისცვალება ქვეყანაში. თუნდაც იმიტომ, რომ დღეს აქ, როგორც იქნა, შემოვაღწიე. შარშან ამ დროს არ მიშვებდნენ. თქვენ კარგად გამახსენეთ .ბუნებრივია, იმ ადამიანების მიმართ, რომლებიც თქვენ ახსენეთ, შურისძიების მომხრე არასდროს ვყოფილვარ…
_ ისინი თქვენს გვერდით ისხდნენ ბატონო თემურ… შურისძიებაზე არავინ საუბრობს…
_ ააა. ხო… ჩემ გვერდით. ჩემ გვერდით, მარჯვენა მხრიდან გამგებელი, მარცხნიდან კი მეუფე იჯდა. მაგრამ გეტყვით მაგაზეც, არ არის პრობლემა. არც მაშინ გაუკეთებიათ შეფასება და არც ახლა აკეთებდნენ ამ ამბავისა. სახარებაში კი წერია, სავლე პავლედ გადაიქცაო, თუმცა, ამჯერად, ამ პერიოდში მასეთი ადამიანების პოვნა ძალიან ძნელია. სავლეები სავლეებად რჩებიან. მათ თავად უნდა ჰქონდეთ იმის უნარი და გამბედაობა, რომ როცა სიტუაცია შეიცვალა ქვეყანაში, ფერისცვალება დაიწყო და გადადგნენ თანამდებობიდან. ახლა, ამის მერე იტყვიან, ჭკუასელი ზეწოლას ახდენსო. არავითარ ზეწოლას არ ვახდენ, ბუნებრივია, მაგრამ ისე, რა თქმა უნდა, ვურჩევ, რომ გადადგნენ, _ აღნიშნა ჭკუასელმა.
ჭკუასელის და ჯიქიას მსგავსად, 19 აგვისტოს, სახელისუფლებო ტრიბუნაზე კოჰაბიტაციურ რეჟიმში “ქართული ოცნების” სხვა წევრებიც ისხდნენ. როგორც ჩანს, დეპუტატის მსგავსად მათაც დაავიწყდათ, რა ხდებოდა შარშან ამ დროს.
მართალია, მათ დაავიწყდათ, მაგრამ არ დავიწყებია რიგით ადამიანებს და არ დაგვავიწყდება ჩვენ. არ დაგვავიწყდება როგორც მოგვდევდა სპეცრაზმი, როგორ გადავიარეთ ნისლიანი მთები იმისთვის, რომ ბახმაროს შესასვლელში გადაღებული კადრები გადაგვერჩინა და საზოგადოებას ის რეალობა ენახა, რომელიც გასული წლის 19 აგვისტოს ბახმაროში იდგა. ჩვენ არც ის დაგვავიწყდება, რომ ის პოლიციელები, რომლებიც დღეს მაღალ თანამდებობებზე არიან, გასულ წელს “ნაციონალების” სიმბოლიკიან მაისურებს არიგებდნენ. გვახსოვს და კადრებსაც ვინახავთ.
შარშან გადაღებულ ერთ-ერთ ვიდეოში ერთი ასეთი დეტალია: სამხარეო პოლიციის მთავარი სამმართველოს დღევანდელ მაღალჩინოსანს, გურამ ასათიანს, გუბერნატორის მოადგილე ლელა თავართქილაძე სცენიდან ეძახის, რომ მოქალაქეს, რომელსაც ნაციონალების სიბოლიკიანი მაისური მიაქვს, გაჰყვეს და პირადად დარწმუნდეს, ჩაიცმევს თუ არა (იხ. ვიდეო ჩhttps://gurianews.com/1.html?task=videodirectlink&id=229).
ასათიანი, სხვა კოლეგების მსგავსად წელსაც ბახმაროში იყო და ამჯერად “მეოცნებეებს” უკრავდა ტაშს!
ერთი სიტყვით, გურიაში კოჰაბიტაციამ პიკს მიაღწია _ შარშან ხუთიანებიანი ქუდებით, წელს კი “საოცნებო” შეძახილებით _ “წინ, გამარჯვებისაკენ!”
დღეს ყველა “ქართული ოცნების” მეხოტბეა _ ძველი კომუნისტები და ძველი “მოქალაქეთა კავშირელები”; შარშანდელი “ნაციონალები”; “ნაციონალების” შიშით ჩირგვებში მსხდომები; ნიკოლაიშვილის და “ნაციონალების” ბრძანებით ახლობლების გამწირავები, თუმცა, მერე ისევ “ნაცინალებისგან” გაწირულები და კიდევ ღმერთმა იცის, მერამდენე ხელისუფლების ნავში გადამხტარები!
ბოლოს, როგორც წესი, ბახმაროში სუფრა გაიმართა, რომლის თამადა თემურ ჭკუასელი ყოფილა. ჩვენთვის ცნობილი არაა, რა სადღეგრძელოები ბრძანა ბატონმა თემურმა, თუმცა, ქართული ტრადიციებიდან გამომდინარე თუ ვივარაუდებთ, იგი აუცილებლად ადღეგრძელებდა სუფრაზე მსხდომ იმ ადამიანებს, რომლებმაც ის და მისი თანამოაზრეები ბახმაროში არ შეუშვეს, რომლებიც “ოცნების” წევრებს და მათ მხარდამჭერებს ციხით ემუქრებოდნენ!
თუ კოჰაბიტაციაა, ბოლომდე კოჰაბიტაცია იყოს!!!
გოჩა ჯიქია და მაიკო გიორგაძე ბახმაროს შესასვლელთან 2012 წლის 19 აგვისტოს
მაია გიორგაძე, გოჩა ჯიქია და ანტონ ხუნდაძე ბახმაროში 2013 წლის 19 აგვისტოს
ჩოხატაურის მუნიციპალიტეტის გამგეობის პრესსამსახური, თეონა ჩიგოგიძე “ნაციონალების” სამსახურში
თეონა ჩიგოგიძე, ამჯერად, “ოცნების” სამსახურში
