გასულ კვირას გურია ისევ ყურადღების ცენტრში იყო _ ცენტრალური ტელევიზიების იუმორისტული შოუები ოზურგეთის საკრებულოს თავმჯდომარის დავით დარჩიას "კაი კაცობაზე" ხუმრობდნენ.
დარჩიას "პოპულარობა" "გურია ნიუსის" სტატიამ გამოიწვია, რომელშიც ოზურგეთის მუნიციპალიტეტის საკრებულოს თავმჯდომარის ქონებრივ დეკლარაციაზეა საუბარი.
დეკლარაციაში აღნიშნულია, რომ დავით დარჩიას შპს ახალი სერვისიდან 15 000 ლარი ერგო საჩუქრად. დარჩია ამბობს, რომ მჩუქებლის შესახებ ინფორმაციას არ ფლობს დასძენს, რომ ეს თანხა "კაი კაცობისთვის, ადამიანობისთვის და ვაჟკაცობისთვის გადეცა".
გასული კვირის ერთ-ერთი მნიშვნელოვანი თემა "ეროვნული ფორუმის" წევრის დაკავება გახლდათ. თენგიზ კაპანაძე ოზურგეთის მუნიციპალიტეტის ადმინისტრაციული შენობის წინ ნასვამ მდგომარეობაში დააკავეს. როგორც ითქვა, კაპანაძემ დავით დარჩიას სიტყვიერი შეურაცხყოფა მიაყენა
ამ ფაქტს ოზურგეთის მაჟორიტარი დეპუტატი ზვიად კვაჭანტირაძე გამოეხმაურა:
"თენგიზ კაპანაძე ნამდვილად ჩვენი ერთ-ერთი ყველაზე აქტიური მხარდამჭერი იყო. ვერანაირ სამსახურს ვერ ეღირსა აქამდე, ისევე როგორც ძალიან ბევრი ჩვენი აქტივისტი. ბუნებრივია, იგი განაწყენებულია და შეიძლება შეგვაგინოს კიდეც.
საერთოდ, უსამართლობაა, როდესაც ასე უყურადღებოდ მივატოვეთ ძალიან ბევრი და სულ ველოდებით რაღაც კონკურსებს და ატესტაციებს თვითმმართველობებში, სადაც ისევ წლის ბოლომდე გადაიწია ვადებმა, რომ ხალხს იქ დასაქმების შანსები მივცეთ. მე ამ კანონს ხმა არ მივეცი, რადგანაც უსაფუძვლოდ მივიჩნევდი", _ აღნიშნავს დეპუტატი.
უსამართლობის განცდა "ქარული ოცნების" წევრებს და მხარდამჭერებს დიდი ხანია აქვთ. ამის მიზეზი ის გახლავთ, რომ მიუხედავად დაპირებისა, მათი სამსახურებით უზრუნველყოფა ვერ მოხერხდა. უფრო მეტიც, თანამდებობებზე ის ადამიანები დაინიშნენ, რომლებიც 2012 წლის საპარლამენტო არჩვენების წინ "ნაციონალების" გამარჯვებისთვის აკრძალული ხერხებით იბრძოდნენ. "ქართული ოცნების" წევრებსა და მხარდამჭერებს აშანტაჟებდნენ, დევნიდნენ, "რუსეთის აგენტებს" და "სამშობლოს გამყიდველებს" ეძახდნენ.
ხელისუფლება ამბობს, რომ ყველაფერს კონკურსი დაალაგებს, თუმცა, არცერთ მნიშვნელოვან თანამდებობაზე კონკურსი არ ცხადდება.
მიუხედავად ამისა, საკონკურსო ციებ-ცხელება ბევრს აწუხებს. ამ თემაზე G-News TV-ის ყოველკვირეულ გადაცემაში "კვირის თემა" ჩოხატაურის მუნიციპალიტეტის გამგებლის მოადგილემ, საკონკურსო კომისიის თავმჯდომარემ მინდია ჟღერიამ ისაუბრა.
მისი თქმით, კონკურსი 15 დეკემბრამდე გაიმართება და საკონკურსო განაცხადების მიღება მალე დაიწყება.
ჟღერია ვერ აკონკრეტებს რამდენპროცენტიანი ზღვრის გადალახვა მოუწევთ კონკურსანტებს. კანონის თანახმად, ტესტირების ეტაპის მინიმალურ გამსვლელ ზღვარს ადგენს შესაბამისი მუნიციპალიტეტი, სწორი პასუხების მინუმუმ _ 50%, მაქსიმუმ 75% – ის ფარგლებში.
როგორც საკონკურსო კომისიის თავმჯდომარე ამბობს, ეს ძალიან მალე, საკონკურსო კომისიის პირველივე შეხვედრაზე გაირკვევა.
ჟღერიას ინფორმაციით, საკონკურსო კომისიის სახელისუფლებო კადრებით დაკომპლექტება იმან გამოიწვია, რომ არასამთავრობო ორგანიზაციებმა კომისიის წევრობაზე უარი თქვეს. მას არ დაუკონკრეტებია, რომელი ორგანიზაციებიდან მიიღეს უარი. არც ის დააკონკრეტა, რატომ არ მიიწვიეს საკონკურსო კომისიაში მედიის წარმომადგენლები.
საკონკურსო კომისიის თავმჯდომარე იმედოვნებს, რომ კონკურსის შედეგად მუნიციპალიტეტი პროფესიონალი კადრებით დაკომპლექტება:
_ კარგი იქნებოდა, რომ კონკურსი სამსახურის უფროსებსაც გაევლოთ, მაგრამ ეს ჩვენი გადასაწყვეტი არ არის. რომ ყოფილიყო, ალბათ, მათაც კონკურსის წესით შევარჩევდით. მეც მივიღებდი კონკურსში მონაწილეობას, _ აღნიშნა ჟღერიამ, რომელმაც გადაცემაში უკვე გამოქვეყნებული ტესტების ნიმუშებიდან შეკითხვები დავუსვით _ გამგებლის მოადგილემ დასმული სამი შეკითხვიდან, ორზე სწორი პასუხი ვერ გაგვცა.
მინდია ჟღერიას ინფორმაციით, ტესტებს იუსტიციის სასწავლო ცენტრი შეადგენს.
სიპ "საჯარო სამსახურის ბიუროს" უფროსის 2014 წლის 10 სექტემბრის #73/სა ბრძანების თანახმად, ტესტის სისწორეზე პასუხისმგებელი დაწესებულებაა. ტესტირების შედეგების გასაჩივრების მიზნით, დაწესებულებაში იქმნება საპრეტენზიო კომისია, რომელიც შესაბამისი ტესტირების პროცესის დასრულებიდან (ტესტირების ჩატარების დღიდან) 3 კალენდარული დღის ვადაში განიხილავს საჩივრებს და იღებს გადაწყვეტილებებს. საჩივარი ტესტირებაში მონაწილე პირმა საპრეტენზიო კომისიას უნდა წარუდგინოს შესაბამისი ტესტირების ჩატარების დღიდან ერთი კალენდარული დღის ვადაში. საპრეტენზიო კომისია მიღებულ გადაწყვეტილებებს დაუყოვნებლივ აწვდის შესაბამისი მუნიციპალიტეტის საკონკურსო-საატესტაციო კომისიას ("გურია ნიუსის" ინფორმაციით, საპრეტენზიო კომისია სამი წევრით დაკოპლექტდება და ჩოხატაურში, ორი წევრის ვინაობა უკვე ცნობილია _ საკრებულოს თავმჯდომარე ზაალ მამალაძე და გამგებელი ირაკლი კუჭავა).
ტესტის შეფასება ხდება ქულათა სისტემით. მაქსიმალური ქულაა 60.
ტესტი მოიცავს 45 ტესტურ დავალებას საქართველოს კანონმდებლობიდან და ზემოთ აღნიშნული ბრძანებით გათვალისწინებული თემატიკის შესაბამისად, ასევე, 15 ტესტურ დავალებას უნარ-ჩვევების ნაწილიდან.
p.s. სტატია დასაბეჭდად მზად იყო, როცა გავარკვიეთ, რომ პარლამენტში პროექტი შევიდა, რომლის თანახმადაც თვითმმართველობებში საჯარო მოსამსახურეთა საშტატო რაოდენობის განმსაზღვრელი ფორმულა შეიცვალა
ახალი ფორმულის თანახმად, რამდენი მაჟორიტარული ოლქიც არის მუნიციპალიტეტში, საშტატო რიცხოვნობას იმდენი საშტატო ერთეული დაემატება.
_ დაზუსტდა კოდექსის 156-ე მუხლის პირველი პუნქტით განსაზღვრული მუნიციპალიტეტის საჯარო მოსამსახურეთა ზღვრული რაოდენობის მარეგულირებელი "ფორმულა", კერძოდ: გამგეობის/მერიის და საკრებულოს აპარატის საჯარო მოსამსახურეთა საშტატო ნუსხებით გათვალისწინებულ ადგილობრივი თვითმმართველობის საჯარო მოსამსახურეთა საშტატო რაოდენობაა არანაკლებ 30 ერთეულისა. იმ მუნიციპალიტეტებში, სადაც ამომრჩეველთა რაოდენობა არის 45 000 კაცზე ნაკლები, საჯარო მოსამსახურეთა საშტატო რაოდენობა არ უნდა აღემატებოდეს აღნიშნული მინიმალური რაოდენობის (30 საშტატო ერთეული), შესაბამის საკრებულოში 2014 წლის ადგილობრივი თვითმმართველობის წარმომადგენლობითი ორგანოების არჩევნებისათვის დადგენილი მაჟორიტარული ოლქების რაოდენობის 3.2 კოეფიციენტზე ნამრავლისა და თვითმმართველ ერთეულში რეგისტრირებულ ყოველ 450 ამომრჩეველზე ერთი საშტატო ერთეულის დამატებით მიღებულ ჯამს. ხოლო, იმ მუნიციპალიტეტებში, სადაც ამომრჩეველთა რაოდენობა არის 45 000 კაცზე მეტი, საჯარო მოსამსახურეთა საშტატო რაოდენობა არ უნდა აღემატებოდეს საჯარო მოსამსახურეთა მინიმალური რაოდენობის (30 საშტატო ერთეული), შესაბამის საკრებულოში 2014 წლის ადგილობრივი თვითმმართველობის წარმომადგენლობითი ორგანოების არჩევნებისათვის დადგენილი მაჟორიტარული ოლქების რაოდენობის 2.3 კოეფიციენტზე ნამრავლისა და თვითმმართველ ერთეულში რეგისტრირებულ ყოველ 500 ამომრჩეველზე ერთი საშტატო ერთეულის დამატებით მიღებულ ჯამს. აღნიშნული ფორმულით თავიდან იქნება აცილებული მუნიციპალიტეტის მოსამსახურეთა არსებული რაოდენობის არსებითი ცვლილება, თუმცა დაწესდება შეზღუდვა შტატების გაზრდის თავიდან ასაცილებლად, _ აღნიშნულია "ადგილობრივი თვითმმართველობის კოდექსში ცვლილების შეტანის შესახებ" საქართველოს ორგანული კანონის პროექტში, რომლის ავტორიც გია ჟორჟოლიანია.
