გადასცემს თუ არა საქართველო თბილისის №8 ციხის მსჯავრდებულს მიკაილ კადიევს რუსეთის ფედერაციას, ეს მის ლტოლვილის სტატუსზეა დამოკიდებული. თუმცა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ სტატუსთან დაკავშირებით მას ოფიციალური უარი უთხრა, რაც კადიევმა თბილისის სააპელაციო სასამართლოში გაასაჩივრა.
თუმცა, სანამ სასამართლო მიიღებს საბოლოო გადაწყვეტილებას, რუსეთის ფედერაციის გენერალური პროკურორის მოადგილემ, უკვე მიმართა წერილით საქართველოს სამართალდამცავ ორგანოებს, სადაც რუსეთის ფედერაცია პირობას დებს, მიკაელ კადიევის ექსტრადიციის შემთხვევაში, მის მიმართ არ განხორციელდება წამება და არაადამიანური, ღირსების შემლახველ მოპყრობა.
დაიჯერებს თუ არა საქართველოს ხელისუფლება რუსეთის ფედერაციის დიპლომატიურ გარანტიებს, ამას დრო გვიჩვენებს. თუმცა, კაიდევის ძმა, რამზად კადიევი "გურია ნიუსთან" ამბობს, რომ შესაძლოა, მისი ძმა რუსეთსა და საქართველოს შორის პოლიტიკური ვაჭრობის საგანი გახდება.
მიკაილ კადიევის ადვიკატი მალხაზ პატარაია კი "გურაი ნისუთან აცხადებს, რომ "მიკაილ კადიევის რუსეთისთვის გადაცემა არშეიძლება, მოკლავენ!"
მიკაილ კადიევის ძმა ასევე ამბობს, რომ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ყველა საბუთი წარუდგინეს, მიუხედავად ამისა, სამინისტრომ მისი ძმისთვის ლტოლვილის სტატუსის მინიჭებაზე უარი განაცხადა.
"გურაი ნიუსთან" რამზად კადიევი ამბობს, რომ მის ძმას "ბათუმში, სპეცოპერაციის დროს, ყველა დოკუმენტაცია მოპარეს. თუ საქართველოს ხელისუფლება კანონის მიხედვით იმსჯელებს, ჩემი ძმის ექსტრადაცია არ მოხდება. ეს მხოლოდ იმ შემთხვევაში შეიძლება მოხდეს, თუ ისინი არაკანონიერი გზით წავლენ. თუმცა, ჩვენ ამას არ დავუშვებთ. არსებობს კანონი, არსებობს სასამართლო და ევროპის საერთაშორისო სასამართლოც. რუსეთში ჩემი ძმის ექსტრადაცია რომ მოხდეს, ჩვენ ამ საქმეს სტრასბურგის სასამართლოში წავიღებთ და ამჟამინდელი ხელისუფლების წინააღმდეგ საჩივარს შევიტანთ."
მისივე თქმით, სამართალდამცავებს დაღესტნიდან ოფიციალური საბუთები ჩამოუტანეს, რითიც დასტურდება, რომ მიკაილ კადიევი საგანგებო სიტუაციათა სამინისტროში მაშველი იყო და პარალელურად ადამიანის უფლებებსაც იცავდა. თუმცა, სამინისტრომ ეს არ გაითვალისწინა.
"ჩემი ძმა ადამიანის უფლებათა დამცველი იყო. სასამართლოში ამის დამადასტურებელი 100-მდე ფურცელი წარმოვადგინეთ. თუმცა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დღემდე ამტკიცებს, რომ ჩემი ძმა იყო საგანგებო სიტუაციათა სამინისტროში უფროსის მოადგილე. ეს ტყუილია. წარმოვადგინეთ საბუთები, ბრძანება მისი სამსახურში დანიშვნის შესახებ, სადაც შავით თეთრზე წერია, რომ ის იყო ჩვეულებრივი მაშველი."
მინდა გითხრათ, რომ იმ საბუთების შესახებ, რომელიც საქართველოში წარმოვადგინეთ, ინფორმაცია რუსეთის სპეცსამსახურებთან მივიდა. თავიდანვე, როგორც კი ჩემმა ძმამ ლტოლვილის სტატუსის მინიჭების შესახებ განცხადება შეიტანა, ერთ-ერთი უფლებათა დამცველმა რომელიც ჩემს ძმასთან ერთად მუშაობდა დაღესტანში, წარმოადგინა საბუთი საქართველოს ლტოლვილთა და განსახლების სამინისტროში, სადაც წერია, რომ მიკაილი მუშაობდა უფლებადაცველად, გამოდიოდა რუსეთის წინააღმდეგ, ითხოვდა დამოუკიდებლობას და დაღესტნელი ადამიანების უფლებებს იცავდა.
ამის შემდეგ იცით რა მოხდა? ორი კვირის შემდეგ ამ ადამიანზე მოხდა თავდასხმა, მისი მანქანა დაცხრილეს. ერთი კვირის შემდეგ კი, მის სახლში ბომბი აღმოაჩინეს. გვინდა, ყველაფერი გამჭირვალედ ჩატარდეს. არასამთავრობო ორგანიზაცია, საზოგადოება და ჟურნალისტები დაესწრონ სასამართლო პროცესს.
მივმართავ საქართველოს ხელისუფლებას და იმ ადამიანებს, ვინც ჩემი ძმის, მიკაილ კადიევის რუსეთის ხელისუფლებისთვის გადაცემას აპირებს, ან უნდათ ჩემი ძმა მოიპარონ. თუ ჩემს ძმას, არაკანონიერი გზით, პოლიტიკური შეღავათისა და სუბსიდიების სანაცვლოდ რუსეთის ფედერაციას გადასცემენ, ჩვენ, ამას არ დავუშვებთ! ამ საქმეს ასე არ დავტოვებთ. საქართველოს ამჟამინდელი ხელისუფლების წინააღმდეგ საჩივარს სტრასბურგში შევიტან და მორალური ზიანისთვის კომპენსაციას მოვითხოვთ".
"გურია ნიუსი" შეგახსენებთ, რომ დაღესტნელი ეროვნების მოქალაქე მიკაილ კადიევი, 2013 წლის 13 ივნისს ბათუმში დააკავეს. იგი დაკავების დღიდან აცხადებს, რომ უკანონოდ იმყოფება პატიმრობაში თბილისის №8 საპყრობილეში.
"შუაღამისას შემოიჭრნენ თბილისში ჩემს მიერ ნაქირავები ბინაში, ჩხრეკისას ჩამიდეს "მაკაროვის” სისტემის პისტოლეტი, 8 ცალი ვაზნა და ცელოფანში შეკრული რაღაც ფხვნილი, რომელიც თურმე 2253,83 გრამ ჰექსოგენის შემცველ ფეთქებად ნივთიერებას შეიცავდა.
ამის გამო დამაკავეს მე და ჩემთან ორი დღის წინ სტუმრად ჩამოსული ჩემი ბიძაშვილი რიზვან ომაროვი. დაკავებიდან რამდენიმე საათში შსს-მ გაავრცელა ოფიციალური ინფორმაცია, რომ თითქოს ჩვენ "განზრახული გვქონდა საზოგადოებრივი თავშეყრის ადგილებში აფეთქების გზით ტერორისტული აქტების მოწყობა” და თურმე ჩვენ "კარგად გაწვრთნილი მეომრები ვიყავით”. მალე თვითონ შსს-მ უარყო ეს აბსურდული ბრალდება და ცეცხლსასროლი იარაღის უკანონო შეძენა-შენახვის ბრალდებით (სსკ-ის 236-ე მუხლის I ნაწილით გათვალისწინებული დანაშაული) მე და რიზვან ომაროვს 2-2 წლით თავისუფლების აღკვეთა მოგვისაჯეს."
