საქართველოს პარლამენტის საფინანსო საბიუჯეტო კომიტეტის თავმჯდომარე დავით ონოფრიშვილი, შესაძლოა, დაკავებული პოსტიდან გადააყენონ. საკითხს "ქართულ ოცნებაში“ უახლოეს მომავალში განიხილავენ.
საქმე იმაშია, რომ ონოფრიშვილი პოსტიდან გადაყენებული ირაკლი ალასანიას პარტიის "თავისუფალი დემოკრატების“ წევრია, საპარლამენტო უმრავლესობა კი მიიჩნევს, რომ ოპოზიციური პოლიტიკური ძალის წარმომადგენელი, ბიუჯეტზე პასუხისმგებლობას ვერ აიღებს, რაც პრობლემაა.
"დავით ონოფრიშვილი მაღალი დონის სპეციალისტია, არის მაღალი დონის ექსპერტი, მაგრამ ოპოზიციური ფრთა ბიუჯეტის შესრულებაზე პასუხისმგებლობას ვერ იღებს. საფინანსო-საბიუჯეტო კომიტეტის ხელმძღვანელს ევალება არა მხოლოდ ბიუჯეტისთვის ხმის მიცემა და პასუხისმგებლობის აღება, არამედ მის შესრულებაზე კონტროლი, რაც ოპოზიციური ფრთიდან რთულად შესასრულებელია. აღნიშნული კომიტეტის ხელმძღვანელის ან სხვების შეცვლაზე ახლა მსჯელობა არ მიმდინარეობს, მაგრამ ვნახოთ, საკითხს მმართველი გუნდი "თავისუფალი დემოკრატების" მონაწილეობით განიხილავს", _ ამბობს პარტია "ქართული ოცნების“ ერთ-ერთი ლიდერი გიორგი ვოლსკი.
ონოფრიშვილის პოსტზე დატოვების საკითხი აქტუალური მას შემდეგ გახდა, რაც მან დევნილთა სამინისტროს თანხების ხარჯვის პრობლემა გამოააშკარავა და აღნიშნა, სამინისტროს ბიუჯეტი ასათვისებელია. მისივე თქმით, ასეთი ერთი-ორი სამინისტროა.
ონოფრიშვილის აზრით, მთავრობამ ასეთი უწყებების ხარჯებს უნდა გადახედოს და პრიორიტეტულობის მიხედვით, იმ უწყებებს გადასცეს, ვისაც ფულის დახარჯვა შეუძლია.
"მაგალითად, დევნილთა და განსახლების სამინისტროს შვიდ თვეში ათვისებული ჰქონდა მისთვის გამოყოფილი თანხების 23% და ახლა, 11-თვის მდგომარეობით არის 60%. თანხები კი, ისეთ პროგრამებს ეხებოდა, რომელიც განსახლების ადგილებში დევნილთა შენახვას და საცხოვრებელი პირობების გაუმჯობესებას ითვალისწინებს. დღეს არის შემთხვევა, როცა თბილისში იძულებით გადაადგილებულებს ასახლებენ, მაშინ როცა თანხები არსებობდა და პრობლემის მოგვარდება შეიძლებოდა", _ განაცხადა დავით ონოფრიშვილმა.
მინისტრი სოზარ სუბარი ონოფრიშვილის განცხადებას "სიცრუის ტირაჟირებას“ უწოდებს და ამბობს, რომ მის სამინისტროში თანხების ათვისების პრობლემა არ არის.
"ჩემთვის ცოტა გაუგებარი ვითარებაა – შეიძლება, გარემოს დაცვის კომიტეტის ან რომელიმე სხვა კომიტეტის თავმჯდომარე, მოადგილე ოპოზიციონერი, მაგრამ საფინანსო-საბიუჯეტო კომიტეტის თავმჯდომარე არ შეიძლება, იყოს ოპოზიციონერი. ოპოზიციონერი თუ განმისაზღვრავს ქვეყნის ბიუჯეტს და რაში ვხარჯო ფული, მაშინ ის ყოფილა ხელისუფლება და მე – ვყოფილვარ ოპოზიცია. ეს ჩვენი სისუსტეა. ეს არის სიცრუის ტირაჟირება, ტყუილი და ონოფრიშვილს შეეძლო, გადაემოწმებინა.
ამ წუთის მონაცემებით, საკასო შესრულება არის 85%, ვალდებულებთან ერთად 90% და იმედი გვაქვს, რომ ამ კვირის ბოლომდე 90% მიუხლოვდება 100%-ს. მართლა იყო პრობლემა, როდესაც მე მოვედი სამინისტროში, შესრულება პრაქტიკულად არ იყო, არც ერთი თეთრი არ იყო მშენებლობების საქმეში ათვისება. ამის შემდეგ მიმდინარეობდა პროექტების დაზუსტება. ამ დროისთვის 85% არის საკასო ათვისება და კვირის ბოლოს ეს პროცენტი მიუახლოვდება 100%-იან ათვისებას. ასე რომ, ათვისების პრობლემა არ არის,“ _ განაცხადა სუბარმა.
დადგება თუ არა ონოფრიშვილის გადაყენების საკითხი დღის წესრიგში, ჯერჯერობით უცნობია, თავად ონოფრიშვილი კი, გადადგომას არ აპირებს. როგორც მან პარლამენტში დღეს გამართულ ბრიფინგზე განაცხადა:
"ჩვენ, ჩვენით არ გადავდგებით – არ ვთვლი, რომ რაკი სოზარ სუბარი გავაკრიტიკე, ამისთვის უნდა გადავდგე ან უნდა გადამაყენონ. თუ ვინმე ჩემს გადაყენებას აპირებს, ვნახოთ რა მოტივაცია იქნება. ამას პარლამენტის წევრთა 76 ხმა სჭირდება. ვიდრე პარლამენტის საფინანსო-საბიუჯეტო კომიტეტის თავმჯდომარე ვარ, პირუთვნელად, პრინციპულად დავიცავ ჩემს უფლებამოსილებას, ვიზიარებ იმ პასუხისმგებლობას, რომ როცა ადგილი ექნება არამიზნობრივ ხარჯებს ან ბიუჯეტის ათვისებაში ჩამორჩენას თუ სხვას, სწორედაც რომ კრიტიკული ვიყო. სანამ პარლამენტის საფინანსო-საბიუჯეტო კომიტეტის თავმჯდომარე ვარ, ჩემს ფუნქციებს შევასრულებ ისე, როგორც საჭიროა”, – განაცხადა ონოფრიშვილმა.
მისივე თქმით, მისი გადაყენება საქმეს არ უშველის და უკეთესია, თუკი მთავრობა უკეთ იმუშავებს.
ცნობისთვის, პარლამენტის რეგლამენტის მიხედვით, კომიტეტის თავმჯდომარე შეიძლება გადააყენოს პარლამენტის სიითი შემადგენლობის უმრავლესობამ ანუ 76-მა დეპუტატმა, 14 დღის განმავლობაში კი, ახალი თავმჯდომარე უნდა აირჩიოს.
თუ ფრაქცია, უმრავლესობა, უმცირესობა, პარლამენტის წევრთა ექვსკაციანი ჯგუფი კომიტეტის თავმჯდომარის უფლებამოსილების ვადამდე შეწყვეტიდან 7 დღის განმავლობაში არ წარადგენს კომიტეტის ახალი თავმჯდომარის კანდიდატურას, ამ ვადის გასვლიდან 5 დღეში კომიტეტის თავმჯდომარის კანდიდატურას კომიტეტის წევრთაგან პარლამენტის თავმჯდომარე წარადგენს.
დღესდღეობით საქართველოს პარლამენტში სამ კომიტეტს ფრაქცია "თავისუფალი დემოკრატების" წევრები ხელმძღვანელობენ. ონოფრიშვილის გარდა პოსტებს ინარჩუნებენ გარემოს დაცვის კომიტეტის თავმჯდომარე გიორგი ცაგარეიშვილი და ევროპასთან ინტეგრაციის კომიტეტის თავმჯდომარე _ ვიქტორ დოლიძეც. გარდა ამისა, ალასანიას გუნდის წევრია პარლამენტის ერთ-ერთი ვიცე-სპიკერი, ფრაქცია "თავისუფალი დემოკრატების“ თავმჯდომარე ზურაბ აბაშიძეც.
ალასანიას გუნდის წევრების გადაყენების საკითხი თავდაცვის მინისტრის გადაყენებისთანავე დადგა, თუმცა პარლამენტმა მაშინ თავი შეიკავა. ისინი კი, საკუთარი ნებით პოსტების დატოვებას არ აპირებენ.
"თუკი ვინმეს სურს რამდენიმე თანამდებობის პირი პოსტიდან გადააყენოს, შეუძლია ეს გააკეთოს, მაგრამ გადადგომები თავად "თავისუფალი დემოკრატების" მხრიდან ინიცირებული არ იქნება, _ აცხადებს ფრაქცია "თავისუფალი დემოკრატების" ხელმძღვანელი ირაკლი ჩიქოვანი.
მისივე თქმით, მთელ რიგ ევროპულ ქვეყნებში პარლამენტის საფინანსო-საბიუჯეტო კომიტეტის თავმჯდომარის პოსტს სწორედ ოპოზიციური პოლიტიკური ძალის წარმომადგენლებს აბარებენ.
"თავისუფალი დემოკრატების" აბსოლუტურად ყველა წარმომადგენელი, რომელიც იკავებს კომიტეტის თავმჯდომარის პოსტს თუ სხვა თანამდებობას საქართველოს პარლამენტში, არის ძალიან მაღალი დონის პროფესიონალიზმით აღჭურვილი ადამიანი და პირნათლად ასრულებს დაკისრებულ მოვალეობას. რაც შეეხება, უშუალოდ დავით ონოფრიშვილს, მე ძნელად მოვძებნი ადამიანს, რომელიც უფრო კომპეტენტური და კვალიფიციურია საბიუჯეტო პროცესებში და არა მხოლოდ პარლამენტში, ასევე მის გარეთაც. მესმის, რომ ვიღაცისთვის შეიძლება გაუგებარია, თუ როგორ შეიძლება ოპოზიციური პარტიის წარმომადგენელი კომიტეტის თავმჯდომარე იყოს. თუ გადავხედავთ ევროპულ პრაქტიკას, არის სახელმწიფოები, სადაც პარლამენტის რეგლამენტით, საფინანსო-საბიუჯეტო კომიტეტის თავმჯდომარე სწორედ ოპოზიციური პარტიის წარმომადგენელია. არის ქვეყნები, სადაც ეს რეგლამენტით დადგენილი არ არის, მაგრამ ამ პოზიციას სწორედ ოპოზიციური ძალის წარმომადგენლები იკავებენ. ყველა ინფორმაცია, რასაც დავით ონოფრიშვილი ავრცელებს, შეესაბამება სიმართლეს და მისი პოზიცია შეუვალი იქნება", _ აცხადებს ჩიქოვანი.
