აფხაზეთში, სოხუმის პროზექტურიდან სამი ქართველის გვამი გაუჩინარდა. ცხედრების გატაცების შემდეგ კი, გარდაცვლილთა სახლებიც გადაწვეს.
ამის შესახებ ინფორმაციას აფხაზური მედია ავრცელებს.
სამი ქართველი გალის რაიონში 12 იანვარს. ე.წ. ანტიტერორისტული სპეცოპერაციის დროს მოკლეს.
გალის აფხაზური მილიციის თანამშრომლებსა და ადამიანის გამტაცებლებს შორის შეიარაღებული დაპირისპირება ოკუპირებულ აფხაზეთში ახალგაზრდა მამაკაცის გატაცებას მოყვა.
გავრცელებული ინფორმაციით, 30 წლის მამაკაცი სოფელ ჭუბურხინჯიდან, ფულის გამოძალვის მიზნით, რამდენიმე დღის წინ გაიტაცეს და მას მიტოვებულ სახლში, სოფელ სიდაში მალავდნენ.
იმავე ღამით, გატაცებულმა ჩაძინებულ გამტაცებელს მისივე იარაღიდან ესროლა, მოკლა და გაიქცა. მან გამტაცებლებს მობილური ტელეფონი წაართვა და გალის მილიციასთან დაკავშირება შეძლო. გაქცეულ მძევალს ორი გამტაცებელი დაედევნა, თუმცა, გალის მილიციის სპეცრაზმმა მას დროულად მიუსწრო. მილიციელებმა ორივე მათგანი მოკლეს. ორმხრივი შეტაკების დროს კი დაიღუპა რუსი ე.წ. მესაზღვრე ანდრეი უდალცოვი და ე.წ. უშიშროების სპეცრაზმის წარმომადგენელი ედუარდ ნერსესიანი.
რაც შეეხებათ ეჭვმიტანილ პირებს, რომლებიც აფხაზური მედიის ინფორმაცით, ქართველები არიან, სამივე მათგანი მოკლულია. ამასთან, გავრცელებული ინფორმაციით , ერთ-ერთი გამტაცებელი გატაცებულის თანასოფლელია, დანარჩენი ორი კი გალის მცხოვრებლები არიან.
ყველა გარდაცვლილის ცხედარი ამ დრომდე სოხუმის პროზექტურაში იყო გადასვენებული, დღეს გამთენიისას, პროზექტურიდან სამივე ქართველის გვამი გაუჩინარდა.
როგორც აფხაზური მედია იტყობინება, პროზექტურაში ორი უცნობი პირი დღეს, გამთენიისას შეიპარა და საოკუპაციო რეჟიმის ე.წ. სამართალდამცველების მიერ ჩატარებული სპეცოპერაციის შედეგად ლიკვიდირებულთა ცხედრები გადაასვენეს.
მათივე ცნობით, ორმა ნიღბიანმა პირმა პროზექტურის მორიგე დააშინა და შენობიდან ჯანო აქუბარდიას, ლევან ხარგელიას და ნუკრი ხუცილავას ცხედრები გაიტანა.
აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია "გურია ნიუსთან“ საუბრისას აცხადებს, რომ სოხუმში მომხდარი ამბის შესახებ ინფორმაცია მასაც აქვს.
"მეტნაკლები სიზუსტით ვიცი რაც სოხუმში მოხდა. გარდაცვლილი როგორც იცით ხუთი პიროვნებაა, თუმცა პროზექტურიდან მხოლოდ ქართველების გვამები დაიკარგა. პროზექტურას ქალბატონი ყარაულობდა, რომელსაც ხელბორკილი დაადეს და სამივე გვამი გაიტაცეს. ეს ამბავი 13 იანვარს მოხდა. დანაშაულში ეჭვმიტანილების აქუბარდიას, ხარგელიას და ხურცილავას გვამები ე.წ. ჯანდაცვის სამინისტროს ექსპერტიზს ბიუროდან დაუდგენელმა პირმა გაიტაცა“, _ ამბობს ყოლბაია.
მისივე თქმით, "გვამების გატაცების შემდეგ, გალის რაიონის სოფელ რეხში, სადაც ეს ე.წ. სპეცოპერაცია ჩაატარეს, ერთ-ერთი გარდაცვლილის, ლევან ხარგელიას სახლი გადაწვეს, რომელთან ერთადაც მისი ბიძის სახლიც არის დამწვარი“.
"სახლების დაწვის ინფორმაცია დღეს მივიღე პირდაპირი წყაროსგან. გარდა ამისა, კიდევ დამწვარია აქუბარდიას სახლი სოფელ ჭუბურხინჯში. არის თუ არა სპეცოპერაცია და სახლების გადაწვა ერთმანეთთან კავშირში არ ვიცი, მაგრამ ამ გვამების გატაცება და სახლების დაწვა ერთმანეთს დაემთხვა. რა რეაგირება მოყვება ამ ამბებს არ ვიცი, მაგრამ ფაქტია, რომ ჩვენ ვერაფერს გავაკეთებთ. ალბათ, აფხაზეთის ე.წ. სამართალდამცავი ორგანოები შესაბამის ზომებს მიიღებენ და სისხლის სამართლის საქმეს აღძრავენ“, _ აცხადებს ყოლბაია.
ვის და რაში სჭირდებოდათ გარდაცვლილთა გვამების გატაცება, ყოლბაია ამაზე ვერ საუბრობს, თუმცა ფიქრობს, ეს გარდაცვლილთა მშობლების გაკეთებული არ არის.
"ეს რომ მშობლებს გაეკეთებინათ და დაეკრძალათ, თავზე დაადგებოდნენ და მათ აიყვანდნენ. უბედურებას კიდევ უბედურება მოყვებოდა. ამიტომ, ვფიქრობ, ეს პროვოკაციის მიზნით ჩაიდინეს და სახლებიც პროვოკაციის მიზნით გადაწვეს. ამ გვამებს სადმე გადაყრიან, გააპატიოსნებენ და დამარხავენ თუ სახლებში ჩაწვეს, ჯერჯერობით არ ვიცი. ეჭვი, იმის შესახებ, რომ შესაძლოა გვამების გადასვენება ნათესავებს სახლში მოეხერხებინათ, სახლები კი შემდეგ ამის გამო დაეწვათ, უსაფუძვლო არ არის, მაგრამ დამტკიცება არ შეგვიძლია“, _ აცხადებს ყოლბაია.
