შინაგან საქმეთა სამინისტროს ინიციატივით, 2016 წლის 1-ლი იანვრიდან ყველა კატეგორიის მართვის მოწმობას 100 ქულა მიენიჭა და წლის ბოლომდე, პატრულის მიერ დაჯარიმების შემთხვევაში, ქულათა გარკვეული რაოდენობა დააკლდება.
გავრცელებული ინფორმაციით, მართვის მოწმობისთვის მინიჭებული ქულების ამოწურვამდე მძღოლი შეტყობინებას მიიღებს, ხოლო მართვის მოწმობის გაუქმების შემთხვევაში კი, ამა თუ იმ კატეგორიისთვის შესაბამისი გამოცდის ჩაბარებას მართვის მოწმობის გაუქმებიდან ორი თვის გასვლის შემდეგ შეძლებს.
როგორც ცნობილია, მართვის მოწმობისთვის მინიჭებული ქულათა სისტემა მსოფლიოს 21 ქვეყანაში წარმატებით ფუნქციონირებს და საქართველოსთვის ახალი კანონპროექტიც სწორედ დასავლეთში ეფექტური მექანიზმის ძირეულ შესწავლასა და ანალიზს ეფუძნება.
"გურია ნიუსი" დაინტერესდა, როგორ აფასებენ მძღოლები შინაგან საქმეთა სამინისტროს ინიციატივას, რის გასარკვევადაც თბილისში მოძრავი ავტომობილების მძღოლები გამოვკითხეთ.
55 წლის, რობერტი სამხარაძის თქმით, მართვის მოწმობებისთვის ქულების მინიჭება საჭირო ცვლილებაა.
"საჭირო ცვლილებაა. მზად ვარ, თუ ჩემი მართვის მოწმობა გაუქმდება გამოცდა თავიდან ჩავაბარო,"_ თქვა მან.
როგორც "გურია ნიუსთან " 20 წლის ნიკა მეურმიშვილმა აღნიშნა, ქულების კლებასთან ერთად ჯარიმის გამოწერა უსამართლობაა.
"ასეა თუ ისე მოძრაობის წესებს მაინც ყველა ვარღვევთ, ალბათ, უფრო იმათ უნდა ეშინოდეთ ვინც მანქანის მართვა არ იცის, მაგრამ ქულების ჩამოკლებასთან ერთად ჯარიმის გამოწერა უსამართლობაა,"_ ამბობს 20 წლის ნიკა.
მართვის მოწმობისთვის ქულების მინიჭება 50 წლის ჯაბული წულაიას არასწორად მიაჩნია.
"არასწორად მიმაჩნია იმიტომ, რომ 50 წლის კაცი ვარ და 30 წელია საჭესთან ვზივარ, აწი მე რაღა გამოცდა უნდა ჩავაბარო. ასაკობრივი ცენზი მაინც დაეწესებინათ. მართალია იშვიათად მაჯარიმებენ, მაგრამ თუ მართვის მოწმობას გამიუქმებენ აღარ ავიღებ,"_ განაცხადა წულაიამ.
47 წლის იაგო სამხარაული კი ამბობს, რომ მიკროავტობუსების მძღოლები ერთ დღეში 100 ქულის ჯარიმას იმსახურებენ, მაგრამ, კანონი მათ იმდენად არ ეხება, რამდენადაც ჩვეულებრივ მძღოლებს.
"გადაწყვეტილების მიღება მთავრობის მოვალეობაა და რასაც საჭიროდ ჩათვლის იმას მიიღებს, თუმცა მართვის მოწმობებისთვის 100 ქულის მინიჭება ცუდია. ქალაქის მიკროავტობუსების მძღოლებს დღეში 100 ქულის ჯარიმა ეკუთვნით, ისე არღვევენ მოძრაობის წესებს, მაგრამ მათ ისე არ აჯარიმებენრამდენადაც ჩვენ, ჩვეულებრივ მძღოლებს. უბრალო მძღოლები ცხვრები ვართ,"_ აღნიშნა სამხარაულმა.
როგორც "გურია ნიუსთან" საუბრისას 28 წლის ლექსო ბექაურმა თქვა, ის მართვის მოწმობებისთვის ქულების მინიჭების სისტემას მიესალმება.
"მართვის მოწმობებისთვის ქულების მინიჭება და ამ ქულების საფუძველზე მართვის მოწმობის ჩამორთმევას ბევრი არასწორად მიიჩნევს, მაგრამ მე მივესალმები იმიტომ, რომ დღეს ბევრი ავტოსაგზაო შემთხვევები ხდება და ყველა მართლა არ იმსახურებს საჭესთან ჯდომას, "_ ამბობს ბექაური.
ერთ-ერთი გამოკითხული, 35 წლის გიორგი თედორაძე ამბობს, რომ მართვის მოწმობის ჩამორთმევის შიში მძღოლებს წესრიგს მიაჩვევს.
"მოძრაობის წესებს ყველა ვარღვევთ. მართვის მოწმობის ჩამორთმევის შიში კი მძღოლებს წესების დარღვევის სურვილს დაუკარგავს და ალბათ, ასე წესრიგს მიეჩვევიან,"_ ამბობს 35 წლის გიორგი თედორაძე.
როგორც "გურია ნიუსთან" საუბრისას ზურა სინაურიძემ აღნიშნა, შინაგან საქმეთა სამინისტროს მიერ მიღებული კანონი გზაზე მოძრაობას უხიფათოს გახდის.
"ბევრმა მოძრაობის წესები საერთოდ არ იცის და გზაზე სახიფათოდ დადის. ახალი კანონის მიხედვით კი აღარ დაარღვევენ წესებს ან თუ მართვის მოწმობა ჩამოერთმევათ, აღარ იქნება მოძრაობა ასეთი სახიფათო,"_ თქვა სინაურიძემ.
ამავე თემაზე:
რა იცვლება საგზაო მოძრაობის წესების დარღვევა/დაჯარიმების კუთხით?
რამდენი ქულა დააკლდება მართვის მოწმობას საგზაო წესების დარღვევაზე
