“რას შვრება სახელმწიფო, რომელიც ვალდებულიცაა და გარანტიც, რომ არჩევნები ჩაატაროს კანონიერად“

ოზურგეთის მუნიციპალიტეტის სოფლებში  და ქალაქ ოზურგეთში წინასაარჩევნოდ „პლაკატებით ომი“ აქტიურ ფაზაშია. ბოძებზე, რომლებზეც სხვადასხვა საარჩევნო სუბიექტების სააგიტაციო მასალაა გაკრული, თითქმის, ყველა ჩამოხეულია.

საარჩევნო კანონმდებლობის თანახმად, საარჩევნო სუბიექტების მიერ წინასაარჩევნო კამპანიის ხელშეწყობის მიზნით, ადგილობრივი თვითმმართველობის ორგანოები ვალდებულები არიან, საარჩევნო პლაკატების გასაკრავად გამოყონ ადგილები. თუმცა, არსებული პრაქტიკა აჩვენებს, რომ კანონს პარტიები არ ემორჩილებიან. ისინი მოწინააღმდეგეთა სააგიტაციო მასალას ხევენ და საკუთარ პლაკატებს აკრავენ.

აქვთ თუ არა რაიმე კონკრეტული ფაქტები პარტიების ლიდერებს სააგიტაციო მასალების ჩამოხევასთან დაკავშირებით, მიმართეს თუ არა რეაგირებისთვის ადგილობრივი თვითმმართველობას ან პოლიციას და რა ინფორმაციას ფლობენ აღნიშნულ სტრუქტურებში, ამასთან დაკავშირებით “გურია ნიუსი“ თითქმის ყველა პარტიის წარმომადგენელს ესაუბრა:

შოთა გოგიბერიძე, საარჩევნო სუბიექტი “დავით თანხან-მოურავი და ირმა ინაშვილი“ გაერთიანებული ოპოზიციის შტაბის ხელმძღვანელი:

“ნამდვილად არის ასეთი ფაქტები, რაც გულდასაწყვეტია, ბოლოს და ბოლოს ამ პლაკატების დამზადებაში კონკრეტული თანხებია გადახდილი,  ენერგია იხარჯება, დიზაინი  კეთდება,  ადამიანებმა გარდა იმისა, რომ პოლოტიკური სიმპატია და ანტიპატია გამოხატონ, ვფიქრობ, სხვის ქონებასაც უნდა სცენ პატივი.  ეს არის საარჩევნო სააგიტაციო მასალა, არჩევნებისთვის საჭირო ინფორმაცია, რომ მიაწოდონ ადამიანებს. მათ თუ არ მოსწონთ, სხვას ნუ წაართმევენ ამის საშუალებას. მართალია,  ჯერ ასე მტკივნეულად არ დამისვამს ეს საკითხი, რომ მიმემართა კონკრეტული ორგანოებისთვის რეაგირების მიზნით, თუ საჭირო იქნება ამასაც გავაკეთებთ“

კახა ჩავლეშვილი, “ნინო ბურჯანაძე დემოკრატიული მოძრაობა“, მაჟორიტარი დეპუტატობის კანდიდატის ავთანდილ ჩხაიძის შტაბის ხელმძღვანელი:

“პლაკატების ჩამოხევა ხდება მასობრივად, რის გამოც,  სამწუხაროდ, კიდევ ხელახლა გვიწევს გაკვრა, ასევე, ღონისძიების გატარება, რომ პლაკატი, რაც შეიძლება მაგრად დავამაგროთ, რაც კიდევ პრობლემას ქმნის მის ჩამოხსნაზე. სერიოზული პრობლემები გვაქვს ამასთან დაკავშირებით. ამას აკეთებს ყველა, ვისაც არ ეზარება. კახა ჩავლეშვილის თქმით, აღნიშნულთან დაკავშირებით უნდა შედგეს ადმინისტრაციულ სამართალდაღვევათა ოქმი,  რომელსაც თვითმმართველობა ადგენს:
“ჩვენ შეგვიძლია მივმართოთ რეაგირებისთვის ადგილობრივ თვითმმართველობას, მაგრამ, სამწუხაროდ, მანამდე ჩვენ თვითონ უნდა გამოვიკვლიოთ ეს ყველაფერი:  ვინ ჩამოხია პლაკატი, უნდა მოვაგროვოთ მტკიცებულებები,  გადავიღოთ ფოტოები, მოვახდინოთ პირის იდენტიფიცირება და მივაწოდოთ თვითმმართველობას. ამას რომ თავად ვერ გამოიძიებენ, ეს ფაქტია. თუ მიუტან ყველანაირ დამამტკიცებელ დოკუმენტს, დააჯარიმებს ვიღაცას. ჩვენ ისედაც უამრავი პრობლემა გვაქვს, საარჩევნო კამპანია ვატაროთ თუ პლაკატის ძირში დავაყენოთ  ფოტოგრაფები და პირის იდენტიფიცირება მოვახდინოთ?  საარჩევნო პროცესის დარღვევები რეაგირების მიღმა რჩება, იმიტომ, რომ მათ შესწავლასა, გამოვლენას და შემდგომ რეგირებასთან დაკავშირებით არის სერიოზული პრობლემები. რას შვრება სახელმწიფო ამ დროს, რომელიც ვალდებულიცაა და გარანტიც, რომ არჩევნები ჩაატაროს კანონიერად. ეს „პლაკატების ომები“, ამ საკითხში გაუთვითცნობიერებელი ადამიანების ქმედებაა. ფაქტია, რომ ხდება მასობრივად და ჯერ არ გამოვლენილა  არც ერთი დარღვევა ამასთან დაკავშირებით და კიდევ პოლიციას და პროკურატურას რომ მიმართო, 5-7 საათი უნდა იჯდე მთელი ერთი კვირის განმავლობაში და ამაზე იმდენი დრო უნდა დაკარგო, თან, როცა იცი, რომ რეაგირება და შედეგი იქნება ნული, არ ღირს საერთოდ, ამიტომ ჯობია, გააგრძელო გზა“, _ამბობს ჩავლეშვილი.

თემურ სალუქვაძე, “ირაკლი ალასანია – თავისუფალი დემოკრატების“ ოზურგეთის მაჟორიტარობის კანდიდატი:

“რა თქმა უნდა პლაკატების ჩამოხევის ფაქტები შეინიშნება ქალაქშიც და სოფლებშიც, არა მარტო ჩემი, არამედ სხვისი. ეს არის, ალბათ, პოლიტიკურად დაბალი დონის მიმანიშნებელი. ჯერჯერობით, მართალი გითხრათ, ჩვენ ვაახლებთ ჩვენით და არ მიგვიმართავს არავისთვის. თუ მასობრივ ხასიათს მიიღებს, იძულებული გავხდებით, მივმართოთ შესაბამისს სამსახურებს რეაგირებისათვის“.

მიხეილ გოგოტიშვილი,“ერთიანი ნაციონალური მოძრაობის“ ოზურგეთის მაჟორიტარი დეპუტატობის კანდიდატის, დავით მჟავანაძის შტაბის ხელმძღვანელი:
“ხელს ასე ვერ დაადებ, რომელ პარტიის წარმომადგენლები აკეთებენ ამას. ფაქტი ერთია, რომ ქუჩაში დადიან და ხევენ პლაკატებს, კანონი კი არეგულირებს ამას, თუმცა, იცოდე უნდა, ვინ აკეთებს. ალბათ, უმეტესად ეს ღამის საათებში ხდება, თუ ჩვენ ამას დავადგენთ, მივიღებთ შესაბამისს ზომებს. ეს ხდება, როგორც ქალაქში, ისე სოფელში. ეს არის დაგეგმილი და ასრულებს რომელიღაც ჯუფი.

პარტია “ქართული ოცნების“ ოზურგეთის შტაბის პრესსამსახურში ამბობენ, რომ აღნიშნულ ფაქტებთან დაკავშირებით შტაბის ხელმძღვანელი ბეგლარ სიოროძე კომენტარს არ აკეთებს.

შსს პრესსამსახურში აცხადებენ, რომ ოზურგეთში არც ერთი პარტიიდან  საარჩევნო პლაკატის დარღვევასთან დაკავშირებით ინფორმაცია არ შესულა, თუმცა, პრესსამსახურისვე ინფორმაციით,  აღნიშნულთან დაკავშირებით სამართალდამცავებმა თავად  აღმოფხვრეს რამდენიმე ფაქტი და რეაგირებისთვის ქალაქ ოზურგეთის მუნიციპალიტეტის მერიას გადასცეს.

ოზურგეთის მუნიციპალიტეტის გამგეობაში “გურია ნიუსთან“ ამბობენ, რომ საარჩვენო სააგიტაციო მასალების ჩამოხევასთან დაკავშირებით არცერთი სოფლიდან არცერთი პარტიას არ მოუმართავს .

ქალაქ ოზურგეთის მუნიციპალიტეტის მერიის პრესსამსახურში კი აღნიშნულთან დაკავშირებით ასეთ კომენტარს აკეთებენ:

„ქალაქ ოზურგეთის მუნიციპალიტეტის მერიას შემდგომი რეაგირებისათვის წერილობით მომართა „ქართული ოცნება-დემოკრატიული საქართველო“-მ ქალაქ ოზურგეთში რამდენიმე ქუჩაზე პარტიის მაჟორიტარობის კანდიდატის პლაკატების ჩამოხევასთან დაკავშირებით. 2016 წლის 15 სექტემბერს შსს ოზურგეთის რაიონული სამმართველოს მიერ პლაკატების ჩამოხევის ფაქტზე დაკავებული იქნა 1 პირი, რომლის მიმართაც ქალაქ ოზურგეთის მუნიციპალიტეტის მერიის შესაბამისი სამსახურის მიერ შედგენილი იქნა ადმინისტრაციული სამართალდარღვევის ოქმი ორგანული კანონის _ „საქართველოს საარჩევნო კოდექსის“ 280-ე მუხლის I ნაწილით და მასალები შემდგომი რეაგირებისთვის გადაგზავნილი იქნა სასამართლოში. სხვა პოლიტიკურ პარტიებსა და გაერთიანებებს ქალაქ ოზურგეთის მუნიციპალიტეტის მერიისთვის არ მოუმართავთ“.