როგორც “გურია ნიუსისთვის” გახდა ცნობილი, ის “ქართული ოცნების” შტაბში ადგილობრივ პარტიულ აქტივს უნდა შეხვედროდა. შეხვედრა პრესისთვის ღია უნდა ყოფილიყო და მასზე ჟურნალისტები მიწვეულები იყვნენ.
შეხვედრის დაწყებამდე ჟურნალისტებმა დაურეკეს კუკულაძეს და ჰკითხეს, როდის დაიწყებოდა შეხვედრა, რაზეც მან უპასუხა, რომ შეხვედრა დახურულია, ჟურნალისტები არ დაიშვებიან და რომ ის ამჟამად ლანჩხუთში არ იმყოფება და ოზურგეთში მიდის.
როგორც მოგვიანებით გავიგეთ, ბატონი კოორდინატორი იმ წუთებში ლანჩხუთში იმყოფებოდა და “ქართული ოცნების” შტაბში ადგილობრივ პარტაქტივთან შესახვედრად ემზადებოდა.
ჩვენ გადავწყვიტეთ კუკულაძე პირადად გვენახა, თუმცა, მისი ნახვის საშუალებას “ქართული ოცნების” ერთ-ერთი წევრი, ნუგზარ ცინცაძე არ გვაძლევდა. ჟურნალისტებმა მაინც მოვახერხეთ, პირადად გვეხილა დავით კუკულაძე.
_ ბატონო დავით, რა საკითხთან დაკავშირებით ჩამობრძანდით და რატომ არის შეხვედრა დახურული?
_ ჩამოვედი რათა გავეცნო ადგილობრივ ახალ სახეებს, ვინ არიან და რას აკეთებენ. ეს არის შეხვედრის მიზანი.
_ ჩვენი გაცნობა არ გინდათ? _ ჰკითხა კოორდინატორს ერთ-ერთმა ჟურნალისტმა.
_ თქვენი გაცნობა რად მინდა?! _ ზედმეტად “თავაზიანი” იყო კოორდინატორი.
მედიის წარმომადგენლებისა და კუკულაძის დიალოგში ლანჩხუთის მაჟორიტარი დეპუტატის ბიუროს ხელმძღვანელი გოგი გეგიაძე ჩაერთო და მოგვთხოვა, დაგვეტოვებინა დარბაზი, რადგან შეხვედრა პრესისთვის დახურული იყო.
ამის შემდეგ ჟურნალისტები გარეთ გამოგვიშვეს. მალე “ქართული ოცნების” შტაბთან ლანჩხუთის გამგებლის მოვალეობის შემსრულებელი, ზაზა ურუშაძე გამოჩნდა, რომელმაც გვითხრა, რომ მისთვისაც უცნობია, რასთან დაკავშირებით იმყოფება უკულაძე ლანჩხუთში: “მე მომიწვიეს და შევეცდები ისიც დავაზუსტო, რატომ არის შეხვედრა დახურული,” _ გვითხრა ურუშაძემ.
ურუშაძის შენობაში შესვლის შემდეგ ჟურნალისტებს ნება დაგვრთეს, შეხვედრას დავსწრებოდით.
შეხვედრაზე იმყოფებოდნენ სოფლების რწმუნებულები, ლანჩხუთის მუნიციპალიტეტის გამგეობის თანამშრომლები, “ქართული ოცნების” წარმომადგენლები; განიხილეს სასოფლო-სამეურნეო საკითხები, რის შესახებაც ყველა სოფლის რწმუნებულმა ისაუბრა. ამით “დემოკრატიულობანას” თამაში დამთავრდა და ჟურნალისტებისთვის შეხვედრა ისევ დახურული გახდა.
ჟურნალისტების დარბაზიდან გამოსვლის შემდეგ “ქართული ოცნების” აქტივის თანდასწრებით წარიმართა “საიდუმლო საუბარი”, რომელიც ამ წუთებშიც მიმდინარეობს.
ჩვენი წყაროს ინფორმაციით, საუბარი ნაციონალების მიერ 19 აპრილს დაგეგმილ აქციას ეხება. წყაროს მტკიცებით, ჩინოვნიკებს მკაცრად აფრთხილებენ, რომ არ დაუშვან მოქალაქეების გამგზავრება ამ აქციაზე.
ჩვენ არ ვამტკიცებთ, ამ ინფორმაციის ნამდვილობას, თუმცა, კუკულაძეს და ლანჩხუთელ “მეოცნებეებს” პირში წყალი აქვთ ჩაგუბებული და კომენტარს არ იძლევიან, რაც დაეჭვების საფუძველს ნამდვილად იძლევა.
რედაქციისგან: რაც შეეხება კოორდინატორს, მისი მედიასთან დამოკიდებულება მეტად საინტერესოა _ თუ იგი ფიქრობს, რომ ჟურნალისტებს მხოლოდ მისი გაცნობა გვაინტერესებს, ძალიან ცდება _ ყველა ჩინოვნიკმა უნდა იცოდეს, რომ მედიის საშუალებით იგი ამომრჩეველს ესაუბრება. როცა მას ჟურნალისტების გაცნობა არ უნდა, ესე იგი, არ სურს მოსახლეობას ესაუბროს, რაც კუკულაძის, გეგიაძის და სხვათა სამწუხაროდ, მათი პრობლემაა და არა _ ჩვენი. სხვათა შორის, მსგავსი პრობლემის არსებობა, არჩევნებში დამარცხების შემდეგ, ნაციონალებმაც აღიარეს და განაცხადეს, რომ მათი მთავარი შეცდომა ხალხთან ინფორმაციის ვერმიტანა იყო.
როგორც ჩანს, “ქართული ოცნების” ზოგიერთი წარმომადგენელი ისე ტკბება ხელისუფლებაში ყოფნით, ცა ქუდად არ მიაჩნია და დედამიწა _ ქალამნად.
სწორედ მსგავს სუბიექტებს გვინდა შევახსენოთ _ ზუსტად ასე ტკბებოდა “ნაციონალური მოძრაობა” ხელისუფლების ხიბლით ოქტომბრის არჩევნებამდე!
