“ჩხატარაშვილი თავიდანვე იყო ჩართული ციხის კადრების საქმეში, ის ადეიშვილის დავალებით ცდილობდა, რომ ციხის კადრების გამოტანა “ქართული ოცნებისთვის” გადაებრალებინა. ამისთვის მათ ჩართეს საქმეში იმჟამად პატიმრობაში მყოფი გენერალი თამაზ თამაზაშვილი და იმ დროს პატიმრობიდან უკვე გათავისუფლებული ბიზნესმენი თამაზ ელიზბარაშვილი. სწორედ ადეიშვილი და ჩხატარაშვილი დგამდნენ სცენარს, რომლის მიხედვითაც კადრების გადაღებას თამაზაშვილი მავალებდა, ფინანსურად კი ელიზბარაშვილი მეხმარებოდა. მათ ჩვენს მიერ გავრცელებული კადრების საპასუხოდ დადგეს კადრები, სადაც ჩანს რომ ციხის ორი თანამშრომელი ურტყამს პატიმრებს. ეს იყო ადეიშვილის იდეა, რაც შეასრულებინეს ფურცხავნიძეს და ფხალაძეს. რეალურად მათ წამება არ ჩაუდენიათ, მათ შეკვეთით და შანტაჟით აიძულა ამის გაკეთება ჩხატარაშვილმა. ჩემს საქმეში დევს ჩხატარაშვილის მიერ ხელმოწერილი ორი დოკუმენტი, პირველი ეს არის დავალება გამოძიების დაწყების შესახებ, მეორე კი საგამოძიებო ჯგუფის შექმნის შესახებ, რომელშიც სოდის და კუდის თანამშრომლები შედიოდნენ,” _ ამბობს ბედუკაძე.
ინფორმცია დავით ჩხატარაშვილის დაკავების შესახებ გუშინ გავრცელდა. მთავარი პროკურატურა მას სამსახურებრივი უფლებამოსილების ბოროტად გამოყენებაში, დამამცირებელი, არაადამიანური მოპყრობის ორგანიზებაში; მძიმე ან განსაკუთრებით მძიმე დანაშაულის შესახებ სისხლის სამართლის საქმეზე მტკიცებულების ფალსიფიკაციასა და დანაშაულის პროვოკაციის ორგანიზებაში ადანაშაულებს.
გამოძიებამ დაადგინა, რომ 2012 წლის სექტემბრის თვეში საქართველოს იუსტიციის ყოფილმა მინისტრმა ზურაბ ადეიშვილმა და მთავარი პროკურორის ყოფილმა პირველმა მოადგილე დავით ჩხატარაშვილმა შეიტყვეს, რომ სასჯელაღსრულების N8 დაწესებულებაში გადაღებული იყო პატიმრების ცემისა და წამების ამსახველი ვიდეომასალა. იუსტიციის ყოფილმა მინისტრმა და მთავარი პროკურორის ყოფილმა პირველმა მოადგილემ დავით ჩხატარაშვილმა სასჯელაღსრულების დაწესებულების სხვადასხვა მაღალჩინოსნებთან ერთად დაგეგმეს და განახორციელეს ამავე სასჯელაღსრულების დაწესებულებაში წინასწარ შერჩეული რამოდენიმე პატიმრის დამცირება, წამება, ცემა და სიტყვიერი შეურაცხყოფა, რაც მიზნად ისახავდა საზოგადოებისათვის ცრუ ინფორმაციის მიწოდებას, თითქოსდა სახელმწიფოს შესაბამისმა საგამოძიებო სტრუქტურებმა დროულად გამოავლინეს პატიმართა ცემისა და შეურაცხყოფის ფაქტები. სწორედ დავით ჩხატარაშვილის ორგანიზებითა და დახმარებით განხორციელდა ზემოაღწერილი სცენარი.
გამოძიება გრძელდება დანაშაულში მონაწილე სხვა პირების დადგენა-გამოვლენის მიზნით.
