განათლების სამინისტროს პრესსამსახურის ხელმძღვანელი: "რატომ არის ასეთი აღგზნებული ეს მშობელი, ვერ ვხვდები".
"პირველივე დღეს ისეთი არსებითი მნიშვნელობა აქვს, ბუკი ექნება თუ არა ბავშვს?"
საქართველოს განათლებისა და მეცნიერების სამინისტრომ, მთავრობის გადაწყეტილებით, ყველა მოსწავლეს წიგნები უფასოდ გადასცა. საჩუქრად მიიღეს წიგნები და ბუკები პირველკლასელებმა. თუმცა როგორც აღმოჩნდა, ყველა პირველკლასელს დღეს განათლების სამინისტროს საჩუქარი არ გადასცემია.
"გურია ნიუსმა" პირველკლასელის მშობლისგან შეიტყო, რომ თბილისის ერთ-ერთ სკოლაში მის შვილს არც წიგნები და არც კომპიუტერი არ მისცეს.
"პირველ კლასში რომ მიმყავდა შვილი, ვიცოდი, საჩუქრები გველოდა. ბავშვიც აღტაცებული იყო. სიხარულს ვერ მალავდა. გვაჩქარებდა, სწრაფად წაგვეყვანა სკოლაში. მასწავლებელი წინასწარ გაიცნო და ძალიან მოეწონა, თან ვუთხარით, რომ იქ საკუთარი კომპიუტერიც დახვდებოდა. თუმცა სკოლაში მისულები სახლში უსაჩუქროდ წამოვედით“, _ გვითხრა მშობელმა, რომლის ვინაობას "გურია ნიუსი“ შეგნებულად არ ასახელებს.
ჩვენ განათლების სამინისტროს პრესამსახურს მივმართეთ, სკოლაც დავუსახელეთ და ვკითხეთ, რატომ ვერ მიიღეს იქ პირველკლასელებმა საჩუქარი. სამინისტროში დაგვპირდნენ, რომ ინფორმაციას გადაამოწმებდნენ და თავად დაგვიკავშირდებოდნენ.
მოგვიანებით, ჩვენს ზარზე, განათლების სამინისტროს პრესამსახურის უფროსმა ნატა ასათიანმა დაგვიდასტურა, რომ ნეთბუკების გადაცემა ყველასთვის მართლა ვერ მოესწრო.
_სახელმძღვანელოები დარიგებულია, რაც შეეხება ნეთბუკებს, ყველაში პროგრამის ჩატვირთა ვერ მოესწრო. უბრალო ნეთბუქებს ხომ არ ვურიგებთ ბავშვებს? დღის განმავლობაში დასრულდება ეს პროცესი და ხვალ ყველას ექნება, _ გვითხრა ასათიანმა.
_ვის უნდა ჩაეტვირთა პროგრამა კომპიუტერებში, თავად კომპანია "იუ-ჯი-თის,“ რომელსაც ნეთბუკების დამზადების ვალდებულება ჰქონდა და რომელთანაც ხელშეკრულება გააფორმა სამინისტრომ?
_არა, "იუ ჯი თის“ ეს ვალდებულება არ აქვს აღებული. ეს ვალდებულება ჩვენს ერთ-ერთ სიპს, განათლების მართვის საინფორმაციო სისტემას (EMIS) აქვს. რომელმაც ნაწილ პარტიაში ჩატვირთა პროგრამა და ნაწილს ხვალამდე მოასწრებს. პირველივე დღეს ისეთი არსებითი მნიშვნელობა აქვს, ბუკი ექნება თუ არა ბავშვს?
_ დღეს ყველა სააგენტო წერდა, რომ ყველა პირველკლასელს გადაეცა კომპიუტერები, თუმცა, როგორც აღმოჩნდა, ასე არ ყოფილა, რაც დაგვიდასტურა კიდეც მშობელმა და ბუნებრივია, დავინტერესდით.
_ რატომ არის ასეთი აღგზნებული ეს მშობელი, ვერ ვხვდები. სკოლაში არ უთხრეს მას რომ ხვალ მის შვილს ექნება ბუკები? წიგნები კი დარიგებული აქვთ. გადაამოწმოს.
_გვითხრა უკვე, რომ არც წიგნები მიუღიათ და არც კომპიუტერი.
_წიგნები სკოლებშია დარიგებული და ყველა პირველკლასელს, წესით, უნდა ჰქონდეს.
_ რამდენ კომპიუტერში დარჩა ჩასატვირთი პროგრამა?
_ერთ-ორ სკოლაში თუ დარჩებოდა დასარიგებელი და იმასაც ხვალ მიიღებენ.
მოგვიანებით ჩვენმა რესპონდენტმა შეგვატყობინა, რომ სკოლიდან დაურეკეს, მისვლა სთხოვეს და წიგნებიც და კომპიუტერებიც დაურიგეს.
"წიგნებიც მოგვცეს. ზოგი ძველია და გვითხრეს, რომ ცოტა ხანში გამოგვიცვლიან. ჯერ სახელმძღვანელოების ბეჭდვა არ დასრულებულა და ამიტომ ვერ გადმოგეცით დროულად ყველაო“, _ აღნიშნა მშობელმა.
