"ერთი მანქანა რომ ჰყავდეს საკრებულოს ამით ქვეყანა არ დაინგრევა"_ ამის შესახებ "გურია ნიუსთან" ქალაქ ოზურგეთს საკრებულოს თავმჯდომარე გელა კობალაძემ იმ თემის კომენტირებისას განაცხადა, რომლის თანახმადაც ქალაქ ოზურგეთის მუნიციპალიტეტმა მსუბუქი ავტომობილის შესაძენად ტენდერი გამოაცხადა.
აღნიშნულისთვის მუნიციპალიტეტის ბიუჯეტიდან 35 000 ლარია გამოყოფილი.
როგორც კობალაძე "გურია ნიუსთან" აღნიშნავს, ის 7 თვის მანძილზე სამსახურეობრივი მოვალეობის შესასრულებლად საკუთარი ავტომობილით გადაადგილდებოდა.
"რამდენიმე დღეა, რაც გადავწყვიტე საკუთარი ავტომობილის გაყიდვა, ოჯახური მდგომარეობის გამო, დავუტოვე მეგობარს თბილისში გასაყიდად. ახლა ჩემი მეგობრის მანქანით დავდივარ", _ აღნიშნავს კობალაძე.
კობალაძე მეგობარში ბესიკ ქარჩავას გულისხმობს, თუმცა, ჩვენი ინფორმაციით, ავტომობილი ბიზნესმენ ილია კეჭაყმაძეს ეკუთვნის.
არსებული ინფორმაციით, ქალაქ ოზურგეთის საკრებულო სწორედ ამ ავტომობილის შეძენას გეგმავს, შესაბამისი თანხა კი, 35 000 ლარი, კეჭაყმაძეს გადაერიცხება, რასაც კატეგორიულად უარყოფს თავად საკრებულოს თავმჯდომარე.
"არ გაგიჭირდებათ იმის დადგენა, თუ ვისია ეს ავტომანქანა, მე გეტყვით, რომ ავტომობილი რეგისტრირებულია ჩემს მეგობარ ბესიკ ქარჩავაზე, შესაბამისად არის მისი საკუთრება.
ასევე, ეს ავტომანქანა, რომლითაც მე დავდივარ ღირს დაახლოებით 50 000 დოლარი, მას 35 000 ლარის, შეიძლება, მხოლოდ ფარები და საბურავები ჰქონდეს. ასე რომ, მინდა დაგარწმუნოთ, რომ ეს ინფორმაცია არის აბსურდი.
ჯერ ერთი მე არ ვყიდულობ მაღალი გამავლობის მანქანას, ჩვენ უნდა შევიძინოთ "სედანის" ფირმის ავტომობილი, ეს არის რანგის მიხედვით.
ჩვენ ყველაფერი კანონის წესით გვაქვს დაცული", _ აღნიშნავს კობალაძე და დასძენს, რომ გამოცხადებულ ტენდერთან არანაირ კავშირში არაა ქვეყანაში არსებული მძიმე ეკონომიკური მდგომარეობა, რადგან ეს თანხა 2 თვის წინ გამოიწყო.
"ეს არ ნიშნავს, იმას, ამ თანხებს ვფლანგავთ, მანქანა სჭირდება როგორც საკრებულოს თავმჯდომარეს, აპარატს და მთლიან შემადგენლობას, ასე რომ ერთი მანქანა რომ ჰყავდეს საკრებულოს ამით ქვეყანა არ დაინგრევა, მით უმეტეს ამდენ ხანს ვსარგებლობდი ჩემი პირადი ავტომობილით", -აღნიშნა კობალაძემ.
