საქართველოს მორაგბეთა ეროვნული ნაკრები დღეს გამთენიისას ინგლისში გაემგზავრა, სადაც მსოფლიო თასისთვის მზადების მესამე, ბოლო ეტაპია დანიშნული.
ინგლისში გამგზავრების წინ მორაგბეებს საქართველოს პრემიერ-მინისტრმა ირაკლი ღარიბაშვილმა უმასპინძლა და სპორტსმენებს გზა დაულოცა. პრემიერ-მინისტრთან ერთად მორაგბეებს სპორტისა და ახალგაზრდობის საქმეთა მინისტრი ტარიელ ხეჩიკაშვილი, ვიცე-პრემიერი კახი კალაძე, რაგბის კავშირის ხელმძღვანელები და მთავრობის წარმომადგენლებიც შეხვდნენ.
"ჩვენ ყველაფერს ვაკეთებთ იმისათვის, რომ საქართველოში რაგბი სულ უფრო განვითარდეს, რომ ხელშეწყობა გაიზარდოს.
იცით, რომ ამოქმედდა რაგბის განვითარების სახელმწიფო პროგრამა. ფონდი „ქართუ“ აგრძელებს დაფინანსებას და ბატონი ბიძინა ივანიშვილი არის ჩართული ამ პროგრამაში.
სწორედ ამ ერთიანი ძალისხმევით შევძელით ის, რომ უკვე 15 ახალი არენა ექნებათ მორაგბეებს. თქვენი დამსახურება არის ის, რომ ახალგაზრდული მსოფლიო ჩემპიონატის ჩატარების მანდატი საქართველომ წამოიღო. 2017 წელს ჩვენი ქვეყანა უმასპინძლებს ახალგაზრდულ მსოფლიო ჩემპიონატს.
მინდა გისურვოთ წარმატება, მჯერა რომ ღირსეულად წარმოაჩენთ ჩვენს ქვეყანას," _ მიმართა პრემიერმა მორაგბეებს.
შეგახსენებთ, რომ მსოფლიო თასზე ჩვენი გუნდი ჯგუფში ოთხ შეხვედრას ჩაატარებს: 19 სექტემბერს ტონგას გაეჯიბრება, 25 სექტემბერს არგენტინას, 2 ოქტომბერს ახალ ზელანდიას, ხოლო 7 ოქტომბერს – ნამიბიას.
"კარგა ხანია მოსამზადებელი ეტაპი დავიწყეთ და ერთი სული გვაქვს, როდის გავალთ მინდორზე – გვინდა შედეგი ვნახოთ. ინგლისში სამი თამაში გველის და ამ შეხვედრებში საბოლოოდ გამოიკვეთება ჩვენი სათამაშო ტაქტიკა და ძირითადი შემადგენლობა", – განაცხადა „ბორჯღალოსნების" მთავარმა მწვრთნელმა მილტონ ჰეიგმა.
საქართველოს ნაკრები მსოფლიო თასამდე სამ საწვრთნელ შეხვედრას ჩაატარებს: 28 აგვისტოს ინგლისის ავივა პრემიერშიფის გუნდ „ნიუკასლ ფალკონზთან", 2 სექტემბერს კანადის ნაკრებთან, 5 სექტემბერს კი იაპონიასთან.
