“ოზურგეთელებს ვპირდები, რომ მომდევნო ოთხ წელიწადში ყველა სოფლის ცენტრალური გზა ასფალტირებული იქნება. ყველა სოფელში დასრულდება გაზიფიცირების პროცესი და ყველა სოფელს ექნება წყალმომარაგება,” _ ამბობს “ქართული ოცნების” ოზურგეთის მერობის კანდიდატი ბეგლარ სიორიძე.
“ქართული ოცნების” კანდიდატი ამბობს, რომ არჩევის შემთხვევაში, ნებისმიერი ამომრჩევლის პრობლემა მისი პირადი საზრუნავი იქნება.
“კიდევ ერთხელ მივმართავ ოზურგეთელებს, მხარი დამიჭირონ და გააკეთონ არჩევანი იმ ახალი ოზურგეთის სასარგებლოდ, რომლის შენებაც ჩვენ ფაქტობრივად ნულიდან დავიწყეთ” _ ამბობს ბეგლარ სიორიძე, რომლის ინტერვიუდან გაიგებთ, როგორ აფასებს არჩევნებს და რა გეგმები აქვს მომავალში.
_ ბატონო ბეგი, როგორ შეაფასებდით არჩევნების პროცესს?
_ უპირველეს ყოვლისა, მინდა თითოეულ ამომრჩეველს მადლობა გადავუხადო, ვინც მოქალაქეობრივი ვალი მოიხადა და არჩევნებზე მივიდა. ასევე, უნდა აღვნიშნო, რომ საზოგადოება ჩემთვის არ იყოფა ჩემს და სხვის ამომრჩევლებად და თითოეული მათგანის არჩევანს პატივს ვცემ.
“ქართულმა ოცნებამ” ადგილობრივი თვითმმართველობის არჩევნები მშვიდ და სამართლიან ვითარებაში ჩაატარა. ასეთივე იყო გარემო ოზურგეთში, თუმცა, უნდა ითქვას, რომ არჩევნების მშვიდად ჩატარება ჩვენი ოპონენტების ინტერესებში არ შედიოდა. მათი მხრიდან, მთელი წინასაარჩევნო კამპანიის პერიოდში ხშირი იყო მიზანმიმართულად მოწყობილი პროვოკაციები. არსებობს ასეთი ფაქტების ამსახველი მასალები. ჩემმა ოპონენტმა მთელი თავისი წინასაარჩევნო კამპანია მხოლოდ ცილისწამებას და ჩემ შესახებ ჭორების გავრცელებას დაუთმო. არჩევნების დღეს კი არაერთ უბანზე დაფიქსირდა ხმის მიცემის პროცესის ხელის შეშლის მცდელობები. ამ ყველაფერმა საბოლოოდ ამომრჩეველს საკმაოდ დაძაბული ფონი შეუქმნა.
_ ბატონო ბეგი, როგორ ფიქრობთ, რამ იქონია გავლენა არჩევნების ამგვარ შედეგებზე?
_ სწორედ ზემოთ ჩამოთვლილი ფაქტორებია იმის მიზეზი, რომ ოზურგეთში მეორე ტური გახდა საჭირო. მას შემდეგ, რაც ჩემი ოპონენტი დამოუკიდებელ კანდიდატად დარეგისტრირდა, რითაც პარტიის გადაწყვეტილებას დაუპირისპირდა, “ქართულმა ოცნებამ’” იგი პარტიიდან გარიცხა. თუმცა, მან მაინც გამოიყენა პარტიის მაღალი რეიტინგი და მთელი წინასაარჩევნო კამპანიის მანძილზე ატყუებდა ამომრჩეველებს, რომ “ქართული ოცნების” კანდიდატი თავად იყო. ამ ფაქტორმა გარკვეული გავლენა იქონია ამომრჩეველზე. ყოველივე ზემოთ თქმულიდან გამომდინარე, ჩემს ამომრჩეველს სწორედ ასეთი დეზინფორმაციის პირობებში მოუხდა არჩევანის გაკეთება.
_ არჩევნებამდე რამდენიმე დღით ადრე ოპოზიციურმა პარტიებმა განაცხადეს, რომ თქვენ წინააღმდეგ გაერთიანდნენ. როგორ ფიქრობთ, რა გავლენა იქონია ამ გაერთიანებამ არჩევნების შედეგებზე?
_ პარტიების გაერთიანება პოლიტიკაში მიღებული პრაქტიკაა და ამაში საგანგაშო არაფერია. როცა ერთი კანდიდატის წინააღმდეგ ერთიანდება სხვადასხვა პოლიტიკური პარტია, გამორიცხული არ არის, რომ დღის წესრიგში მეორე ტური დადგეს. თუმცა, აღსანიშნავია ის ფაქტი, რომ ეს იყო იმ პარტიების გაერთიანება, რომლებიც ორიოდე წლის უკან თავად ებრძოდნენ ჩემს ოპონენტს. ამით ყველაფერი ნათქვამია.
_ ამ პერიოდის განმავლობაში თქვენ შესახებ ვრცელდებოდა არაერთი ჭორი და ცილისწამება. რას უპასუხებთ ამ ბრალდებებზე? როგორ ფიქრობთ, ამ შავი პიარკამპანიის ფონზე როგორ უნდა მიიტანოთ სიმართლე ხალხამდე?
_ ჩემმა ოპონენტმა მთელი თავისი წინასაარჩევნო კამპანია მხოლოდ ჩემს კრიტიკას დაუთმო და ამ პერიოდის მანძილზე ჩემ შესახებ მართლაც არაერთი ჭორი გაავრცელეს. ასე აგრძელებს ახლაც და მაგალითისთვის გეტყვით, რომ სოფელ ჭანიეთში, სადაც ახლა საჯარო სკოლის მშენებლობა მიმდინარეობს, ავრცელებენ ხმებს, თითქოს მე ამ სოფელში მიღებული დაბალი პროცენტის გამო სკოლის მშენებლობას აღარ დავასრულებ. ანალოგიურ ჭორებს ავრცელებენ ყველა სოფელში. თუმცა, დარწმუნებული ვარ, ოზურგეთელები ასეთ სულმდაბლობას არ დაიჯერებენ. ჩემთვის თითოეული ადამიანი და თითოეული სოფელი თანაბარი ზრუნვის ობიექტი იქნება ყოველთვის, მიუხედავად იმისა, სად მეტი შედეგი მივიღე და სად _ ნაკლები.
_ ბატონო ბეგი, რა შეძელით ქალაქ ოზურგეთის მერად ყოფნის დროს, რის გამოც ამომრჩეველმა მხარი თქვენ უნდა დაგიჭიროთ?
_ ცოტა შორიდან დავიწყებ, ოზურგეთის მერობა ჩემთვის მხოლოდ თანამდებობა არ ყოფილა. ამ ქალაქის განვითარება, ჩემი არა მხოლოდ სამსახურებრივი ვალდებულება, არამედ ჩემი დიდი ხნის ოცნება იყო. 3 წლის წინ მე ინფრასტრუქტურულად მოშლილი ქალაქი ჩავიბარე. თუ არ ჩავთვლით, ორიოდე ახალ ობიექტს ქალაქში, ოზურგეთი, ფაქტობრივად, 90-იანი წლების ქალაქი იყო. ყველა ქუჩაზე პრობლემა გვხვდებოდა, ქალაქის ცენტრი სრულიად უსახური იყო და ადამიანებს, რომლებიც თითქოს ქალაქში ცხოვრობდნენ, ამორტიზებული გზების გამო ელემენტარულად, გადაადგილების პრობლემაც კი ჰქონდათ. ამ ყველაფრის გამო მთავარ პრიორიტეტად მე და ჩემმა გუნდმა ინფრასტრუქტურა დავისახეთ. დავიწყეთ ქუჩების მოსაფალტების სამუშაოები და საერთო ჯამში, ქალაქში უკვე 36 ქუჩა გვაქვს დაგებული.
ხელისუფლებაში მოსვლისთანავე ჩვენ დავდექით სერიოზული პრობლემის წინაშე. არაადამიანურ პირობებში მცხოვრები უბინაო მოქალაქეები ჩვენგან დახმარებას ელოდნენ. ქალაქის მერიამ კაპიტალურად გაარემონტა ყოფილი საავადმყოფოს ერთ-ერთი შენობა და 54 ოჯახს ცხოვრებისთვის საჭირო ყველა პირობის მქონე, გარემონტებული ფართები გადავეცით. თუ თქვენ შემეკითხებით, რა გავაკეთე ჩემს ქალაქში ყველაზე მნიშვნელოვანი, სწორედ ამ სოციალურ საცხოვრისს დაგისახელებთ. ეს ჩემი ცხოვრების ერთ-ერთი ყველაზე ბედნიერი დღე იყო.
ასევე, სერიოზული პრობლემების წინაშე იდგნენ მრავალბინიანი საცხოვრებელი სახლების მოსახლეობა. კორპუსებში, რომლებისთვისაც საბჭოთა პერიოდის შემდეგ არცერთ ხელისუფლებას არ მიუხედავს, მოსახლეობას უამინდობისას წყალი მუდმივად ჩასდიოდა ბინებში. ჩვენ ამ მიმართულებითაც აქტიური მუშაობა დავიწყეთ და დღეს ქალაქ ოზურგეთში 40-ზე მეტ საცხოვრებელ კორპუსს სახურავის პრობლემა მოხსნილი აქვს. ასევე, გადავხურეთ 300-ზე მეტი ინდივიდუალური საცხოვრებელი სახლი, რომლებიც სტიქიის დროს დაზიანდა. დამეთანხმებით, რომ პატარა ქალაქისთვის ეს ცოტა ნამდვილად არ არის.
ამავე პერიოდში დავდექით იმ გარდაუვალი რეალობის წინაშე, რომელიც, წლებია, ქალაქს აწუხებდა და დაუყოვნებლივ მოგვარებას საჭიროებდა. ქალაქს მუდმივად ემუქრებოდა სტიქია. განსაკუთრებით დიდი პრობლემა გვქონდა ქალაქის ცენტრალურ ნაწილში, გმირთა მოედანზე, სადაც წვიმის დროს მოქალაქეებს სახლში უვარდებოდა ადიდებული მდინარე, მიჰქონდა საკარმიდამო ნაკვეთები და ზარალი მილიონობით ლარს აღწევდა. განვახორციელეთ საკმაოდ ძვირადღირებული პროექტი და ახლომდებარე მდინარეებზე გაკეთდა გაბიონები და ჯებირები, კაპიტალურად მოეწყო სანიაღვრე არხები და ცხაურები. რამაც, საბოლოო ჯამში , ქალაქის დიდი ნაწილის სტიქიისგან დაცვა უზრუნველყო.
ოზურგეთში დაგეგმილი და განხორციელებული ინფრასტრუქტურული პროექტების პარალელურად, ქალაქის მერია მაქსიმალურ ყურადღებას იჩენდა სოციალურად დაუცველი მოსახლეობის მიმართ. საბოლოო ჯამში, შევიმუშავეთ 18 სოციალური პროგრამა, რომლებიც სხვადასხვა საჭიროების მქონე მოქალაქეებზეა გათვლილი. აღნიშნული პროგრამებით მკურნალობა, ოპერაციის გაკეთება და მატერიალური დახმარების მიღება შეძლო ქალაქ ოზურგეთის 8 500 -ზე მეტმა მცხოვრებმა.
ეს ყველაფერი ჩემი და ჩემი გუნდის დიდი ძალისხმევით, სამ წელიწადში შევძელით.
_ რა გეგმები გაქვთ იმ შემთხვევაში, თუ ოზურგეთის მუნიციპალიტეტის მერი გახდებით?
_ რა თქმა უნდა, ჩვენი მუნიციპალიტეტი ჯერ კიდევ უამრავი გამოწვევის წინაშე დგას, ყველაზე მტკივნეული პრობლემა უმუშევრობაა. რასთან დაკავშირებითაც ყველაზე აქტიურად უნდა ვიმუშაოთ. პირადად მე დასაქმების საკითხის მოგვარების გზას ბიზნეს-გარემოს შექმნაში ვხედავ. ჩვენ ხელს შევუწყობთ ბიზნესს და თანახმა ვართ, ვითანამშრომლოთ ყველა ბიზნესმენთან, რომელსაც გული შესტკივა ოზურგეთზე და ჩვენს მუნიციპალიტეტში წარმატებულ პროექტებს განახორციელებს.
აქტიურად გავაგრძელებთ ინფრასტრუქტურის მშენებლობასაც. მაგალითად, ისევ დაგვრჩა ქალაქის გარკვეული გზები დასაგები, მოსაწესრიგებელია წყალმომარაგების და კანალიზაციის სისტემა. ამიტომ ინფრასტრუქტურა მანამ დარჩება ჩემს პრიორიტეტად, ვიდრე ერთი ქუჩა ან ერთი სოფლის გზაც კი მოსაწესრიგებელი იქნება. საჭიროა უფრო მეტი დრო და მომდევნო 4 წელიწადში ყველა დაწყებულ საქმეს ბოლომდე მივიყვანთ.
მოსახლეობის კეთილდღეობა ძლიერ თვითმმართველობაშია. ჩვენ მაქსიმალურად გავაძლიერებთ თითოეულ სოფელს, სადაც შევქმნით განვითარებულ ინფრასტრუქტურას და პარალელურად, აქტიურად ვიმუშავებთ სოფლის მეურნეობის გაძლიერებაზე.
ოზურგეთი საქართველოს მასშტაბით ერთ-ერთი ძლიერი მუნიციპალიტეტი იყო. მოსახლეობის მატერიალურად სტაბილურ ცხოვრებას ჩაის კულტურა უზრუნველყოფდა. სახელმწიფომ უკვე დაიწყო ჩაის რეაბილიტაციის პროგრამა და ამ მხრივ, ქმედითი ნაბიჯებიც გადაიდგა. ამ პროგრამას ჩვენ მაქსიმალურად მივიტანთ ხალხამდე. სახელმწიფო მოსახლეობას საშუალებას მისცემს, ჩაის მოყვანა საკმაოდ დიდი საგადასახადო შეღავათებით დაიწყონ. მერად არჩევის შემდეგ სოფლის მეურნეობის განვითარება ჩემთვის ისეთვე პრიორიტეტი იქნება, როგორც ინფრასტრუქტურა. ჩვენ ისევ ვაქცევთ ჩაის კულტურას ოზურგეთელი ოჯახების შემოსავლის წყაროდ.
ასევე, ოზურგეთელებს ვპირდები, რომ მომდევნო ოთხ წელიწადში ასფალტირებული იქნება ყველა სოფლის ცენტრალური გზა. ყველა სოფელში დასრულდება გაზიფიცირების პროცესი და ყველა სოფელს ექნება წყალმომარაგება.
კიდევ ერთხელ მივმართავ ოზურგეთელებს, მხარი დამიჭირონ და გააკეთონ არჩევანი იმ ახალი ოზურგეთის სასარგებლოდ, რომლის შენებაც ჩვენ, ფაქტობრივად ნულიდან დავიწყეთ. თითოეულ ამომრჩეველს ვპირდები, რომ ნებისმიერი მათგანის პრობლემა ჩემი პირადი საზრუნავი იქნება. მე მჯერა ჩემი ოზურგეთელების.
