“შეხედეთ, რას ჰგავს აქაურობა. მოსახლეობას მისასვლელი გზა ჰქონდა გაკეთებული საკუთარი ხარჯებით, რომელიც გადათხარეს და დატოვეს ისე. ახლა შემოვლითი გზით უწევთ აქაურებს სარგებლობა _ ვერ გაივლი, ისეთი მდგომარეობაა.
რომ გადათხარეს ყველაფერი, დათხარეს ხეები, არ უნდა გაეწმინდათ?! ნაომარს ჰგავს აქაურობა, ტურისტები დადიან ამ გზაზე, რა შთაბეჭდილება დარჩებათ?! არ შეეძლოთ, ტრაქტორით გაესწორებინათ ეს ადგილი ისე, როგორც ადრე იყო, გადათხრილი რომ დატოვეს?! ვის მოსწონს ასე გაკეთებული?! ესაა დამთავრებული პროექტი?!” – “გურია ნიუსთან” საუბარში ჯერ კიდევ რამდენიმე თვის წინ ამბობდნენ ის ადამიანები, ვინც სოფელ გრიგოლეთში სასტუმრო “ლაშთანის” მიმდებარე ტერიტორიაზე ცხოვრობენ.
საქმე ისაა, რომ სოფელ გრიგოლეთში, სასტუმრო “ლაშთანთან” 400 გრძივი მეტრის არხი გაკეთდა გზის და მიმდებარე ტერიტორიის დატბორვის პრობლემის მოხსნის მიზნით, რისთვისაც 200 ათას ლარზე მეტი გაიხარჯა. თუმცა, შესრულებული სამუშაოების ხარისხით უკმაყოფილო დარჩა ადგილობრივი მოსახლეობა. საქმეს ისაა, რომ ხსენებული კოლექტორი 400 მეტრის სიგრძეზე გაიჭრა, რის შედეგადაც მძიმე ტექნიკით გადაითხარა მწვანე ნარგავები, მიწის ნაკვეთები და მათთან მისასვლელი გზები. სწორედ ეს გახდა იქ მცხოვრებთა პროტესტის მიზეზი.
სასტუმრო “ლაშთანთან” შესრულებული ინფრასტრუქტურული პროექტი ადგილობრივი ოპოზიციის კრიტიკის ობიექტიც გახდა და ეს საკითხი ერთ-ერთ საკრებულოს სხდომაზეც გააჟღერეს: “რამდენად ეფექტური იქნება ეს პროექტი, ამას დრო გვიჩვენებს. ეჭვებს ბადებს უშუალოდ კოლექტორის ზომები და რამდენად შეძლებს ის წყლის გატარებას. სულ სხვა საკითხია იქ არსებული მდგომარეობა, რაც გამოიწვია უშუალოდ სამუშაოების შესრულებამ. ვერანაირ კრიტიკას ვერ უძლებს იქ შესრულებული სამუშაოები. იფიქრებ, ატომური ბომბი ჩამოაგდესო, ისეთ მდგომარეობაშია იქაურობა. გადათხრილი ადგილები სრულიად მოუსწორებელია; დასახლებულ პუნქტამდე შესასვლელი მოსახლეობას ჰქონდა საკუთარი სახსრებით გაკეთებული, ახლა კი ყველაფერი გადათხრილია, ხეები მოთხრილია და მიწაზე ყრია. სირცხვილია რაც იქ ხდება”.
მაშინ მუნიციპალიტეტის მერმა ალექსანდრე სარიშვილმა თქვა, რომ თავადაც უკმაყოფილო იყო იქ ნანახით და შემსრულებელი კომპანია არსებული სიტუაციას გამოასწორებდა.
“ჩვენ ვესაუბრეთ შემსრულებლებს და ტერიტორიის გაწმენდა დავავალეთ, რაზეც მათგან თანხმობა მივიღეთ. ასე რომ, მეც უკმაყოფილო ვიყავი იმით, რაც ვიხილე და იმედი მაქვს, მალე ყველაფერი გამოსწორდება”, _ თქვა ალექსანდრე სარიშვილმა მაშინდელ საკრებულოს სხდომაზე ოპოზიციის მხრიდან გაჟღერებული შენიშვნების პასუხად.
ოპოზიციის თქმით, ზემოთ ნახსენები ტერიტორია დღესაც გაუწმენდავია და მოთხრილი ხეები ისევ იქ ყრია:
“ბალახები კი წამოვიდა და გარკვეულწილად დაფარა გადათხრილი ადგილები, თუმცა მოთხრილი ხეები ისევ თვალშისაცემად ყრია. არადა, ახლა ტურისტული სეზონია და უამრავი ადამიანი გადაადგილდება ტერიტორიის მიმდებარედ. სირცხვილია ეს ყველაფერი, არადა, მერმა თვეების წინ გვითხრა, რომ ესაუბრა სამუშაოების შემსრულებელ კომპანიას და მათ მიერ ტერიტორია გაიწმინდებოდა.”
რა ხდება სასტუმრო “ლაშთანის” მიმდებარე ტერიტორიაზე, სადაც თვეების წინ დატბორვის პრობლემის მოსახსნელად კოლექტორი მოეწყო, რასაც სამუშაოების მწარმოებელი კომპანიის მხრიდან მრავალწლიანი ნარგავების მოთხრა და განადგურება მოჰყვა და რატომ არ მოხდა ამ დრომდე ტერიტორიის გაწმენდა, ამის გასარკვევად “გურია ნიუსი” ალექსანდრე სარიშვილს დაუკავშირდა.
“დაახლოებით, ერთი თვის წინ ვიყავი ამ საკითხთან დაკავშირებით სასტუმრო “ლაშთანთან” და იქ რამდენიმე ხე იყო მოთხრილი და უკვე გამხმარი. დანარჩენი სიბინძურე, სიმართლე რომ გითხრათ, არ ყოფილა. დავინტერესდები და აქ არის თორნიკეც (ალბათ, მერმა საკუთარი მოადგილე თორნიკე ტიკაძე იგულისხმა. ავტორი), გავერკვევი და დაგირეკავს ცოტა ხანში”, _ გვითხრა მუნიციპალიტეტის მერმა, თუმცა, ამის შემდეგ არც სარიშვილს და არც მის მოადგილეს აღარ გადმოურეკავთ.
ავტორი
