"გურია ნიუსის" ვებგვერდზე გამოქვეყნებულ სტატიაში, "სრული იმედგაცრუება" ლანჩხუთის "გურიის" მისამართით გამოთქმულ ბრალდებებზე, კლუბის მესვეურებმა, მყისიერად უპასუხეს და დღეს ცენტრალური სტადიონის საპრესკონფერენციო დარბაზში, ადგილობრივი მედიისთვის ბრიფინგი გამართეს.
სხვათა შორის, საზოგადოებაში ბევრი პასუხგაუცემელი კითხვა და დაგროვდა "გურიას" ირგვლივ, რაზეც კლუბის მხრიდან შესაბამისი რეაგირება დაგვიანდა.
სწორედ ამ ბრიფინგზე ჩათვალეს კლუბის აღმასრულებელმა და ფინანსურმა დირექტორებმა – ოთარ ჩხაიძემ და თენგიზ კიკვაძემ, კლუბში არსებულ დღევანდელ სიტუაციაზე ამომწურავი ინფორმაცია მიეწოდებინათ ჟურნალისტებისთვის.
თავდაპირველად საუბარი სპონსორის თემას შეეხო. როგორც თენგიზ კიკვაძემ გვითხრა, არსებობს ხელშეკრულება კლუბსა და იმ პიროვნებას შორის, რომელიც "გურიის" თანაინვესტირებას მოახდენს. საუბარია გიორგი იმნაიშვილზე, რომელიც ერთ-ერთი ვერსიით გვარად ინაიშვილია. თუმცა ირკვევა, რომ პასპორტში იმნაიშვილი ფიგურირებს და ამ ხელშეკრულების თანახმად მას ევალება კლუბისთვის კვალიფიციური მწვრთნელებისა და ფეხბურთელების მოძიება, სელექციის წარმოება და ამის შედეგად ახალგაზრდული გუნდიდან ძირითად შემადგენლობაში ადგილობრივი ფეხბურთელების პერიოდულად ინტეგრირება.
როგორც ირკვევა, ის იქნება გუნდის უფროსი, რომელიც ანაზღაურების სახით თვეში 1200 ლარს მიიღებს. ასევე იმნაიშვილს შეეძლება კლუბის ნებისმიერი ფეხბურთელი ტრანსფერზე დააყენოს და გაყიდოს, ხოლო შემოსავლის გარკვეული პროცენტი კლუბს დარჩება. საუბარია თანხის ნახევარზე, თუმცა ჯერ საბოლოო შეთანხმებამდე საქმე არ მისულა.
თენგიზ კიკვაძის თქმით, "გურიის" თანაინვესტირება მიმდინარე წელს სავარაუდოდ 750 ათასი ლარით გამოიხატება და ამ თანხიდან გარკვეული ნაწილი უკვე დაიხარჯა, როგორც წინასასეზონო სამზადისისთვის, ასევე სხვა ხარჯებისთვის. აღმოჩნდა, რომ ოფიციალურად ამ თანხების ხარჯვასთან კლუბს შეხება არ აქვს და არც სპონსორი მიიჩნევა სამომავლოდ დებიტორად, ანუ ის რასაც სპონსორი ხარჯავს, არსად არ ფიგურირებს.
აქვე ერთი საინტერესო დეტალიც შევიტყვეთ. ლეგიონერების კლუბში დამტკიცებისთვის საჭირო თანხები სწორედ სპონსორისგან მოდის და რაოდენ საკვირველიც არ უნდა იყოს, ეს ნაღდი ანგარიშსწორებით ხდება. ამის დამადასტურებლად კიკვაძემ ქვითარიც გვაჩვენა, სადაც აღნიშნულია, რომ ორი ლეგიონერის ფედერაციაში შესატანი თანხა (30 ათასი ლარი) თავად შეიტანა, როგორც ნაღდი ფული. ეს თანხა მას სპონსორმა ხელზე გადასცა და ამის შემდეგ შეიტანა სფფ-ს ანგარიშზე.
ამ საკითხზე საზოგადოებაში ეჭვი გაჩნდა, ლეგიონერების თანხას კლუბი ბიუჯეტის ფულით იხდისო, თუმცა ამას არ ადასტურებენ კლუბის მესვეურები და არც იმასაც, რომ ფეხბურთელების ხელფასი 10 ათას დოლარს აღწევსო. ბატონმა თენგიზმა, გვაჩვენა ხელშეკრულებები, სადაც კლუბი ვალდებულებას იღებს ამა თუ იმ ფეხბურთელს გარკვეული თანხა გადაუხადოს ხელფასის სახით, თუმცა 2 ათას ლარზე მეტი გასამრჯელო არავის აქვს. ყოველ შემთხვევაში კლუბის ვალდებულება ესაა, დანარჩენის დამატება კი – სპონსორის.
როგორც ჩხაიძე, ასევე კიკვაძე კატეგორიულად არ იზიარებენ მოსაზრებას ადგილობრივი ფეხბურთელების იგნორირების თაობაზე. მათი თქმით, კლუბმა ყველაფერი გააკეთა, რომ თუნდაც სანდრო ბახია და ვანო წილოსანი გუნდში დარჩენილიყვნენ, მაგრამ გარკვეულ მიზეზთა გამო ეს ვერ მოხერხდა. მიზეზად დასახელდა სახელფასო თანხის შეუთანხმებლობა, ასევე არასაკმარისი სათამაშო დონე. თუ წილოსანი უკვე ოფიციალურად "ტორპედოში" თამაშობს, ბახია კლუბის საკუთრებაა და იჯარით არის განათხოვრებული "მერცხალში".
"ბახია და კიდევ რამდენიმე ლანჩხუთელი ფეხბურთელი, სათამაშო პრაქტიკის ასამაღლებლად დროებით ოზურგეთში ითამაშებენ და თუ საჭირო გახდა "გურიასაც" დაუბრუნდებიან . რატომ გონია ვინმეს, რომ ჩვენი კლუბი დაინტერესებული არაა ადგილობრივი ფეხბურთელებით და მხოლოდ მოყვანილ კადრებზე აკეთებს აქცენტს, ეს ასე ნამდვილად არაა, – ამბობს ოთარ ჩხაიძე.
ბრიფინგზე საუბარი იყო თანამშრომელთა დავალიანების დაფარვაზე. არსებობდა ეჭვი, რომ ნარჩენი ხელფასი ზოგს არ მიუღია, ზოგმა კი მიიღო და ეს ყველაფერი სუბიექტურად ხდებოდა. კლუბის მესვეურებმა აღნიშნეს, რომ ყველა დავალიანება ეტაპობრივად დაიფარება და 31 მაისამდე კლუბს სახელფასო დავალიანება არ ექნება.
სხვათა შორის, კლუბის ფინანსური ხელმძღავნელების საუბრიდან ირკვევა, რომ საბანკო კრედიტი, რომელიც კლუბს აღებული ქონდა, უკვე თითქმის გადახდილია.
"პროგრესბანკის" დავალიანება მთლიანად დაიფარა, ხოლო "ტაოპრივატბანკის" ნარჩენი კრედიტი, 45 ათასი ლარი, მარტში დაიფარება და საბანკო დავალიანების ასე მტკივნეული თემაც ამით ამოიწურება. სხვათაშორის, საზოგადოების ერთ ნაწილში მუსირებდა 300 ათასი ლარის თემაც, რომელიც ვითომ კლუბს "პროგრესბანკისთვის" ჯარიმის სახით უნდა გადაეხადა. ვინაიდან 6 თებერვალს "პროგრესბანკს" ჩავურიცხეთ ნარჩენი 155 317 ლარი, ბანკმა პირგასამტეხლო თანხის გადახდა გვაპატია და ამ 300 ათასი ლარის გადახდის ვალდებულება მოგვეხსნა" – გვითხრა კიკვაძემ.
ბრიფინგზე გამგებელ ზაზა ურუშაძის შესახებაც òთქვა, რომ ის არასოდეს არ ჩარეულა კლუბის ფინანსურ თუ საკადრო საკითხებში. თუმცა მოგვიანებით თენგიზ კიკვაძემ დაიჩივლა, ხელფასი ჩამოგვაკლეს და აუცილებელია მისი გაზრდაო. ვისი გადაწყვეტილებით მოაკლეს მას და დირექტორატის სხვა წევრს ხელფასები, ეს არ დაუკონკრეტებია.
ბრიფინგზე სხვა თემებზეც გაკეთდა აქცენტი, ითქვა სტადიონისა და ბაზის მოვლა-პატრონობის ხარჯების მნიშვნელოვნად შეკვეცაზე, სხვა ფინანსურ თუ საკადრო ეკონომიებზე. ასევე ბრიფინგზე აღინიშნა, რომ ახალი მწვრთნელისა და ფეხბურთელების ოფიციალური წარდგენა სხვადასხვა მიზეზთა გამო დაგვიანდა. უახლოეს მომავალში ეს პრეზენტაცია და ყველა კითხვაზე პასუხის გაცემა, ისე მოხდება, როგორც წესია – დასძინეს კლუბის მესვეურებმა.