საპარლამენტო უმრავლესობის წევრებმა მომავალი სახალხო დამცველის კანდიდატად ნინო ლომჯარია დაასახელეს. მმართველი გუნდის წევრები სახალხო დამცველის თანამდებობაზე ლომჯარიას გარდა, 6 კანდიდატს განიხილავდნენ, რომელთა შორის იყვნენ თამარ ქალდანი, სოფო ჯაფარიძე, ვახუშტი მენაბდე, სოფო ხორგუანი და ანა ნაცვლიშვილი.
აღსანიშნავია, რომ ნინო ლომჯარია სახელმწიფო აუდიტის სამსახურის ხელმძღვანელის პირველი მოადგილე იყო. მანამდე კი “სამართლიანი არჩევნებისა და დემოკრატიის საერთაშორისო საზოგადოების” აღმასრულებელი დირექტორი.
,,გურია ნიუსი“ დაინტერესდა რა მოლოდნინები არსებობს ნინო ლომჯარიასთან დაკავშირებით და როგორ შეიძლება შეფასრდეს უჩა ნანუაშვილის 5 წლიანი მოღვაწეობა.
,,ქართული ოცნების“ წევრის ალექსანდრე ქანთარიას განცხადებით, მმართველი გუნდის მიერ სახალხო დამცველის კანდიდატად ნინო ლომჯარიას დასახელება მისაღები არ არის, რადგან დასახელებულ კანდიდატებს შორის არსებობდნენ ისეთი კანდიდატები, რომლებიც უფრო მისაღებია. რაც შეეხება უჩა ნანუაშვილს, ქანთარია ამბობს, რომ სახალხო დამცველი ობიექტურობით რამდენიმე წლის წინ უფრო გამოირჩეოდა.
_ ბატონო ალექსანდრე, თქვენმა გუნდმა სახალხო დამცველის კანდიდატად ნინო ლომჯარია წარადგინა, როგორ აფასებს მის კანდიდატურას და რას ფიქრობთ უჩა ნანუაშვილის ხუთწლიან მოღვაწეობაზე?
_ მოგეხსენებათ, სახალხო დამცველის პოსტზე სულ შვიდი კანდიდატურა განიხილებოდა, მათ შორის, სამოქალაქო სექტორიდან ოთხი კანდიდატურა იყო დასახელებული, ხოლო მმართველი გუნდიდან სამი.საბოლოოდ ჩემმა გუნდმა არჩევანი ნინო ლომჯარიაზე შეაჩერა. ვერ გეტყვით, რომ მისი კანდიდატურა ჩემთვის მთლად მისაღებია, რადგან ამ პოსტზე ისეთი კანდიდატები განიხილებოდნენ, რომლებიც ჩემთვის უფრო მისაღები იყო. ჩვენ უამრავი კითხვა გვექნება ნინო ლომჯარიასთან, ვნახოთ რა წვლილს შეიტანს დემოკრატიის განვითარებისთვის. რაც შეეხება უჩა ნანუაშვილს, ვფიქრობ, ის დასაწყისში უფრო ობიექტური იყო, ვიდრე ბოლო ხანებში. ბოლო დროს, ბატონი უჩა რადიკალიზმისკენ წავიდა, რაღაც ობიექტურობის ჩარჩო შემოხაზა, რომელშიც საერთო სურათს კარგად ვერ ასახავდა _ აღნიშნა ჩვენთან საუბრისას ალექსანდრე ქანთარიამ.
მმართველი გუნდის მიერ დასახელებულ კანდიდატს მხარს არ უჭერს საპარლამენტო უმცირესობა. ,,ევროპული საქართველოს“ ერთ-ერთი ლიდერის სერგო რატიანის განცხადებით, ლომჯარია ბოლო პერიოდში სახელმწიფო სტრუქტურაში მუშაობდა, თუმცა კრიტიკით არ გამოირჩეოდა.
“სახალხო დამცველის კანდიდატურა, რომელიც ხელისუფლებამ შეარჩია, სახელმწიფო სტრუქტურაში მუშაობდა და ჩვენ მისგან ამ დროის განმავლობაში კრიტიკა არ გვესმოდა. ასეთ კანდიდატურას ჩვენი მხარდაჭერა არ ექნება. პრობლემა მდგომარეობს მის ბოლოდროინდელ საქმიანობაში და ასევე იმაში, თუ როგორ შეირჩა სახალხო დამცველის კანდიდატურა” – განაცხადა რატიანმა.
ექსპერტი სოსო ცისკარიშვილი, უჩა ნანუაშვილის ხუთწლიან მოღვაწეობას დადებითად აფასებს. მისი განცხადებით, უკეთესი იქნებოდა თუ მმართველი გუნდი სახალხო დამცველის პოსტზე არ დაასახელებდა კანდიდატს, რომელიც სახელმწიფო მოხელე იყო.
_ ბატონო სოსო, როგორ აფასებთ ხუთი წლის განმავლობაში სახალხო დამცველის პოსტზე უჩა ნანუაშვილის მოღვაწეობას და მმართველი გუნდის მიერ ამ თანამდებობაზე დასახელებულ ნინო ლომჯარიას კანდიდატურას?
–არაფერი მაქვს საწინააღმდეგო იმ ადამიანის მიმართ, რომელიც ,,ქართული ოცნების“ ფავორიტები არიან, მაგრამ უკეთესი იქნებოდა მმართველ გუნდს ომბუცმენის თანამდებობაზე არ დაესახელებინა კანდიდატი, რომელიც სახელმწიფო მოხელე იყო. რაც შეეხება ბატონ უჩას, ის საერთაშორისო ასპარესზე უდიდესი ნდობით სარგებლობს. საქართველოში უჩა ნანუაშვილის ავტორიტეტი ძალიან მაღალია. გვახსოვს ამერიკის შეერთებული შტატების ელჩის განცხადება, რომელმაც ვერ მოითმინა და შოლტი გადაჰკრა ჩვენი იუსტიციის ვაი მინისტრს განცხადებას შეურაცხყოფილი განცხადებისთვის. დიახ, უკვე მეორე წელია ბატონი უჩა გახლავთ სუბიექტი, რომლის მიჭირხვნის ოცნება მეოცნებეების ერთ-ერთი საშიანაო დავალებაა-განაცხადა ცისკარიშვილმა.
შეგახსენებთ, რომ საქართველოს კონსტიტუციის მიხედვით, სახალხო დამცველს პარლამენტი 5 წლით ირჩევს. უჩა ნანუაშვილს უფლებამოსილების ვადა 7 დეკემბერს ეწურება.
