“ოცნების” ხმოსნების არჩეული პრეზიდენტის, მიხეილ ყაველაშვილის თეირანში ჩასვლასა და აიათოლა ალი ხამენეის დაკრძალვის ოფიციალურ ცერემონიაზე დასწრებას პოლიტიკურ წრეებში კრიტიკა მოჰყვა. რამდენად გამართლებულია აღნიშნული ნაბიჯი დღევანდელ რთულ გეოპოლიტიკურ ვითარებაში — ამ კითხვით “გურია ნიუსმა” პარტია „ახალის“ ჩოხატაურის ორგანიზაციის ლიდერს, ბაჩო ახალაძეს მიმართა.
ჩვენთან საუბრისას პოლიტიკოსმა აღნიშნა, რომ ქვეყნის დასავლური ინტეგრაციის ფონზე, მსგავსი ვიზიტები სტრატეგიულ პარტნიორებს გაუგებარ სიგნალებს უგზავნის.
„როდესაც საქართველო ევროკავშირის კანდიდატი ქვეყანაა და მისი მომავალი დასავლურ ოჯახში უნდა წყდებოდეს, ასეთ დროს ირანში მსგავსი დონის ღონისძიებაზე ქვეყნის სახელით ჩასვლა მძიმე პოლიტიკური შეცდომაა. პოლიტიკაში სიმბოლოებს უზარმაზარი მნიშვნელობა აქვს. ეს არ არის უბრალოდ დაკრძალვაზე დასწრება, ეს არის გზავნილი, რომელსაც მთელი მსოფლიო კითხულობს.
დღეს, როცა საქართველო ისედაც მუდმივად იმყოფება დასავლელი პარტნიორების კრიტიკის ცენტრში, მსგავსი ნაბიჯები კიდევ უფრო აჩენს კითხვებს: საით მიდის ჩვენი ქვეყანა? სახელმწიფოს ინტერესები უნდა იყოს დასავლური კურსის განმტკიცება და არა ისეთი გადაწყვეტილებების მიღება, რომლებიც ჩვენს სტრატეგიულ პარტნიორებს გაუგებარ სიგნალებს უგზავნის. საქართველოს ხელისუფლებას მეტი პასუხისმგებლობა და პოლიტიკური გონიერება მართებს, რადგან ასეთი შეცდომების ფასს საბოლოოდ მთელი ქვეყანა იხდის….“_ ამბობს ახალაძე.
ირანის სახელმწიფო მედიის ცნობით, თეირანში სამგლოვიარო ღონისძიებების გამო უსაფრთხოების განსაკუთრებული ზომებია მიღებული. მხოლოდ დაკრძალვის მეორე დღეს, ღამის განმავლობაში, თეირანის მეტროპოლიტენით 1.3-მა მილიონმა მგზავრმა ისარგებლა, ხოლო სამგლოვიარო ღონისძიებებში მონაწილეთა საერთო რაოდენობა, მომდევნო დღეების განმავლობაში, შესაძლოა 15 მილიონამდე გაიზარდოს.
აიათოლა ალი ხამენეის დაკრძალვის ცერემონია თეირანში რეგიონული დაძაბულობისა და ირანის ისლამურ რესპუბლიკასა და დასავლეთის ქვეყნებს შორის მკვეთრად გაუარესებული ურთიერთობების ფონზე მიმდინარეობს.
ავტორი
